بەپێی هەواڵی چەند دەزگایەكی راگەیاندنی بەریتانی،ئەو خانووەی ئەستێرەی بەریتانی ئیمی واینهاوس كۆچی دوایی تێدا كرد نمایش دەكرێت بۆ ئەوەی بە مەزادێكی ئاشكرا بفرۆشرێت.
میدیاكان زیاتر رایانگەیاند ئەو خانووەی واینهاوس تێیدا كۆچی دوایی كرد و دەكەوێتە ناوچەی كامدن ماوەی چەند مانگێكە نمایش كراوە بۆ فرۆشتن، بەڵام كەسێك نەبوو بیكڕێت،بۆیە بڕیار درا لە مەزادێكی ئاشكرادا دابنرێت بۆ فرۆشتن و نرخی سەرەتایی مەزادەكەش بە 2،8 ملیۆن دۆلار دانرا و بەر لەوەی لە مەزاددا نمایش بكرێت میچنی باوكی، داوای بڕی 4،2 ملیۆن دۆلاری دەكرد، بەڵام كەس ئامادە نەبوو ئەو بڕە پارەیەی پێبدات، پێشتریش چەند كەلوپەلی خانووەكە لەلایەن چەند كەسێكەوە دزران، لەوانە كراسی بووكێنی واینهاوس كە نرخەكەی زیاتر لە 200 هەزار دۆلار بوو ئەمەش بووە مایەی تووڕەبوونی باوكی، بۆیە بڕیاریدا بیفرۆشێت، شایەنی باسە لە ساڵی 2011 و لە ئەنجامی ژەهراوی بوون بە كهول واینهاوس لە ماڵەكەی خۆی بە مردوویی دۆزرایەوە.