سێیەمین خولی فیستیڤاڵی فیلمی "نا بۆ توندوتیژی" لە شاری هەولێری پایتەختی هەرێمی كوردستان بەڕێوەدەچێت.
بەڕێوەبەری سینەمای هەولێر عەدنان عوسمان بە كەناڵەكانی راگەیاند: دەستكردن بە كارەكانی سێیەمین خولی فیستیڤاڵی فیلمی "نا بۆ توندوتیژی" رادەگەیەنین و دەرهێنەران دەتوانن پەیوەندی بە كەناڵەكانی فیستیڤاڵەوە بكەن و فۆڕمی بەشداربوونی فیلمەكانیان لە فیستیڤاڵ وەربگرن.
گوتیشی: پێویستە ناوەرۆكی فیلمەكان پەیوەست بن بە مەسەلەكانی ئافرەتان و ئەو هەموو توندوتیژییەی كە رووبەرڕوویان دەبێتەوە.
بەڕێوەبەری سینەمای هەولێر سەبارەت بە مەرجەكانی بەشداریكردنیش گوتی: پێویستە فیلمەكان بەرهەمی ساڵی 2011 و 2012 بن و ماوەی فیلمەكانیش لە 25 خولەك تێنەپەڕن.
ئەوەشی خستەڕوو: جگە لە 5 فیلمی سینەمایی درێژ، فیلمی كورتی فیكشێن و دیكۆمێنتاریی لەم فیستیڤاڵەدا بەشداردەبن.
سێیەمین خولی فیستیڤاڵی فیلمی "نا بۆ توندوتیژی" لە رۆژی 25ی نۆڤەمبەری 2012 لە شاری هەولێری پایتەختی هەرێمی كوردستان دەست پێدەكات و بۆ ماوەی چەند رۆژ بەردەوام دەبێت.
‌‌
بەڕێوەبەرایەتیی راگەیاندنی گشتیی فیستیڤاڵی فیلمی "نا بۆ توندوتیژی".