چیا مه‌ده‌نی:ئەگەر نەتوانین پشتگیری یەكتریش بكەین با رێگری لە یەكتر نەكە‌ین
*بەرهەمی تازەی هونەریت بەدەستەوەیە؟
هەرئێستا سەرقاڵی دابەشكردنی سێ بەرهەمی هونەرمەند میكائیل بووم لە سیدییە تازەكەیدا. «تۆش وەكو من»، «رێی باران» و «بەرگی ئاڵ» كە دووانیان ئاوازەكانی هی خۆمن. هاوكات لەگەڵ ئەمەشدا خەریكی سیدی یەكەمی شوانە‌ی برای میكایلم كە لەوێشدا ٢ گۆرانییان هونەرمەند میكائیل تێیدا بەشدارە. ئەم سیدییەی شوانە لە٧ گۆرانی پێكهاتووە و گشتیان دابەشكردنی خۆمن و ٢ ئاوازیشیان خۆم دامناون. جیا لەمانە یەك بەرهەمی هونەرمەندی بەتوانا جەلال نەقشبەندیم لەبەر دەستدایە و ئاوازێكی نوێشم بۆ هونەرمەندی لاو نیزام مەلازادە و ٢ ئاوازیش بۆ شێركۆ مەریوانی لەبەردەستدایە كە ئەمانەش لە قۆناغی دابەشكردندان.
بەگشتی گەر من دەرفەتی ئە‌وەم بۆ برەخسایە كە بمتوانیبایە ساڵی ٢٠ بەرهەمی هونەریی باش پێشكەش بكەم زۆر بەختەوەر دەبووم.
*ئایا لەبە‌رنامەتاندایە بگە‌ڕێنەوە كوردستان؟
ئەوەی راستی بێت من زۆربەی ئەو كارانەی كردوومن لەپێناو خزمەت بە نەتەوەكەی خۆم بووە بەقەد دنیایەكیان پێ‌دڵخۆش و سەربەرزم. بۆیە گەڕانەوەم بۆ كوردستان و درێژەدان بەو خزمەتانە بەئەركی سەرشانمیان دەزانم. دەتوانم بڵێم پرۆژەی باشم بەدەستەوەیە گەر دەرفەتم بدرێتێ و بەتەنیا نەمێنمەوە، پێم وابێت لەماوەیەكی كورتدا كاری بەهێز بێتە ئاراوە كە خزمەتی كولتوور و فەرهەنگی نەتەوەكەمان بەتایبەت لەبواری ئینتەرنێتدا لەئاستێكی بەرزدا بكات.
*وه‌ك ئاوازدانەر و دابە‌شكاری موزیك، ئایا موزیكی كوردی مۆركی خۆی لە دە‌ستداوە وەك هەندێك كە‌س دە‌ڵێن؟
-لەزۆر حاڵەتدا بەڵێ وایە. بەتایبەتی كە موزیكی وڵاتێكی عەرەبی یان توركی و فارسی، كە ئەمانە گشتیان لەسەر تایبەتمەندییەكانی فەرهەنگی وڵاتەكانی خۆیان زۆر چاك گەشەیان كردووە و لەدوورڕا دەناسرێنەوە، لەپڕتاو و بەبێ هیچ دەست‌تێوەردانێك هەروەك خۆی دەخرێتە پاڵ تێكستێكی كوردی، شتێكی سەیر نییە كە ئاكامی بەرهەمەكە سەرلێشێوانی پێوەدیار بێت و مۆركی كوردی خۆی لەدەستدابێت. موزیكیش وەكو تێكست لە گۆرانیدا دەبێت تەنانەت لەكاتی پێشكەوتنیشدا رەگ و ریشەی هەر لەناو كۆمەڵگادا داكوتراوبێت و مۆركی كوردی لێبدرێت
*تێكە‌ڵ كردنی ئاواز‌ی غەیرە كوردی بە گۆرانی كوردی چۆن هە‌ڵدە‌سە‌نگێنیت؟
- بە بڕوای من ئەگەر ئەم كارە هۆشیارانە و لەهەمان كاتیشدا لەسەر بنەمایەكی زانستی بكرێت پێویستە. ئێمەش وەك هەموو وڵاتانی دیكە، دەبێ لەفكری داهاتووی موزیك و گۆرانیی خۆمان دابین و بۆ نەوەی داهاتوو بەرهەمی شیاو ئامادە بكەین كە لەباری ئاست و كوالیتییەوە نزم نەبن. بەبڕوای من ئێمە كە كاری داهێنان و داڕشتنی بەرهەمە تازەكان دەخەینە ئەستۆ و بەتەمای نوێكاری لە بواری موزیكی كوردیداین، بەر لە هەموو شت پێویستە ئاگاداری رادەی پێگەیشتن و پێشكەوتنی موزیك لە ئاستی جیهاندا بین و هەر چاومان تەنیا ناوچەكانی دەوروبەر نەبینێ و پێمان وابێت دنیا هەرئەوەندەیە. وڵاتی دی زۆرن كە موزیكەكانیان زۆر لە كورد نزیكە و مۆدێرن و پێشكەوتووشە بۆ ئەوەی شتیان لێ فێربین. ئیلهام و هەست و چێژ وەرگرتن لە بەرهەمی هونەرمەندانی سەركەوتووی جیهان وەختێك كارێكی پیرۆزە كە بەسەلیقە و مۆرالییەتی خۆشمان و بە هەستێكی جوانی كوردانە بەرهەمی نوێی پێ بڕازێنینەوە. ئەم بەرهەمەش بێگومان مەرجە كە پێناسە و تایبەتمەندیی خۆی هەبێت و بەزۆرەملێ خۆ بە ئۆرجیناڵەكەوە هەڵنەواسێت و خۆی پێ ناشیرین بكات. بۆیە من بەفاوڵێكی گەورەی دادەنێم گەر ئێمە هونەرمەندان موزیكی كۆنی وڵاتانی دراوسێ رێك كۆپی بكەین و بەبێ ئەوەی خۆمان پێوەماندوو كردبێت و فكر و هەست و سۆزی خۆمانی تێكەڵاو كردبێت، خۆی لێبكەینە خاوەن و دواتریش دەرخواردی كۆمەڵگای خۆشمانی بدەینەوە. هونەرمەند بەرپرسیارە لە بەرامبەر كارە هونەرییەكانی، درەنگ یان زوو هەڵەكان دەخرێنە بەرباس.
لە كۆتاییدا دە‌ڵێم ئەگەر هەرنەشتوانین لە كارەكانماندا پشتگری یەكدی بین، هیوادارم نەبینە رێگریش بۆ كاری یەكدی. زۆر خۆش دەبوو گەر هەوڵەكان وا بان كە بەشێوەیەكی سەردەمیانە و لە فەزایەكی درووستدا، بە دا هێنانی بەرهەمی بەهێز پێشبڕكێ لەگەڵ یەكدیدا كرابا و خۆمان وەپێش یەكتری دابا. مەخابن زۆر جار لە كلتووری ئێمەدا هێشتاش هەر بەرووخاندنی یەكدی كەسایەتییەكان هەست بە پێشكەوتن دەكەن. بەداخەوە ئەم حاڵەتە ناڕەوایە زۆر جار لە بوارە جواراوجۆرەكاندا زۆر بە زەقی بەدی دەكرێت و لە بەرژەوەندیی نەتەوەكەماندا نییە و لەكاروانی پێشكەوتن دوامان دەخات.
