ئان هاساوای: ئافره‌ته پشیله‌كه خه‌ونی من بوو هاته دی
له دیمانه‌یه‌كدا له‌گه‌ڵ گۆڤاری (ئیفی) هاساوای گوتی: بینینی رۆڵی ئافره‌تی پشیله بۆ من كارێكی زۆر سه‌خت بوو، هه‌روه‌ها چه‌ندین خانمه ئه‌كته‌ری دیكه له هه‌وڵی ئه‌وه‌دا بوون ئه‌و رۆڵه‌یان پێ بسپێردرێت وه‌ك ناتالی پۆرتمان و جیسیكا بێل، به‌ڵام كریستۆڤه‌ر نۆلانی ده‌رهێنه‌ر له كۆتاییدا منی هه‌ڵبژارد ئه‌مه‌ش مایه‌ی خۆشحاڵی من بوو.
ئان هه‌روه‌ها ده‌ڵێت: سێ مانگ خه‌ریكی گفتوگۆی به‌رده‌وام بووین ئینجا توانیم رۆڵه‌كه وه‌ربگرم و ئه‌و كات هه‌ستم به خۆشییه‌كی بێ وێنه كرد و ئه‌مه یه‌كێك بوو له‌و ساتانه‌ی كه تا ماوم له ژیانمدا له بیریان ناكه‌م، چونكه له كاتێكی كه‌مدا گه‌وره‌ترین خه‌ونی من بووه راستی و به‌شێك له ژیانی من، له كاتێكدا من پێموابی ئه‌سته‌مه رۆژێك له رۆژان ئه‌م رۆڵه‌م پێ بسپێردرێت.
هه‌ر سه‌باره‌ت به‌م رۆڵه‌ی ئان ده‌ڵێت: بیرم له‌وه نه‌كردۆتەوه كه تا چه‌ند تێیدا سه‌ركه‌وتوو بووم، چونكه تا ئێستا هه‌ڵسه‌نگاندنی خۆم نه‌كردووه، به‌ڵام به یه‌كێك له سه‌ركه‌وتووترین رۆڵه‌كانی داده‌نێم له ژیانی خۆمدا و زۆریش خۆم به به‌خته‌وه‌ر ده‌زانم كه ده‌رهێنه‌رمنی بۆ ئه‌م رۆڵه هه‌ڵبژارد.
