كورتە فیلمی "دەنگی باران" لە دەرهێنانی جەلال ساعیدپەنا خەڵاتی سێیەمین خولی فیستیڤاڵی نێونەتەوەیی "یەك وڵات، یەك فیلم"ی فەرەنسی بەدەستهێنا.
بە پێی راگەیاندنی گشتیی ئەم فیلمە، كورتە فیلمی كوردی "دەنگی باران" لە دەرهێنانی سینەماكاری كورد جەلال ساعیدپەنا و بە ئامادەبوونی ئەم سینەماكارە سنەییە لە بەشی پێشبڕكێی سێیەمین خولی فیستیڤاڵی نێونەتەوەیی "یەك وڵات، یەك فیلم" One Country One Film لە وڵاتی فەرەنسا نمایشكرا و لە لایەن بینەرانەوە پێشوازییەكی باشی لێكرا و توانی زۆرترین دەنگی ئەم فیستیڤاڵە بەدەستبێنێت و خەڵاتی باشترین فیلمی لە نێوان 47 فیلم لە كیشوەرەكانی ئەورووپا، ئەسیا و ئەمەریكای پێبەخشرا.
فیستیڤاڵی "یەك وڵات، یەك فیلم"، ئەندامانی لێژنەی دادوەرانی نییە و لەڕاستیدا خەڵكی لێژنەی دادوەرانی ئەم فیستیڤاڵە دێنە ئەژماردن و بە دەنگەكانی خۆیان باشترین فیلم هەڵدەبژێرن كە ئەمساڵ فیلمسازی كورد جەلال ساعیدپەنا توانی زۆرترین دەنگ و هەروەها خەڵاتی ئەم فیستیڤاڵە بەدەستبێنێت.
ئەم فیستیڤاڵە بە نمایشی 47 كورتە فیلمی چیرۆكی، ئەنیمەیشێن، دیكۆمێنتاری و ئەزموونی لە سینەماكارانی 47 وڵاتی جیهان لە رۆژانی 26 تا 29ی تەمموز / یۆلیۆی 2012 لە كەشووهەوایەكی جوان و بێوێنە و پێشوازیی و باوەشی كراوەی دانیشتوانی گوندی "ئاپچێت" لە نزیك شاری كلێرمۆن فرانی وڵاتی فەرەنسا بەڕێوەچوو.
فیستیڤاڵی "یەك وڵات، یەك فیلم"، لە هەر وڵاتێك یەك فیلم هەڵدەبژێرت و دەرهێنەرەكەی بانگهێشتی فیستیڤاڵ دەكات و ئەمساڵ بە نوێنەرایەتی لە سینەمای ئێران، تەنیا كورتە فیلمی "دەنگی باران" و دەرهێنەرەكەی لەم فیستیڤاڵەدا ئامادەبوون.
ئەم فیلمە لە لایەن كۆمپانیای سینەمایی "ستاك فیلم" بە بەرپرسیارییەتی "سەتار چەمەنی گوڵ" و "ڤیدا ساڵحی" لە ئاستی دنیادا بە شێوەی نێودەوڵەتی بڵاودەكرێتەوە. ئەمساڵ 37 دەرهێنەر لە 37 وڵاتی جیهان توانیان لەم فیستیڤاڵەدا بەشداری بكەن.
كورتە فیلمی "دەنگی باران" لە دوایین بەشداری نێونەتەوەیی خۆیدا و بە ئامادەبوونی جەلال ساعیدپەنا لە دوو سانسی جیاوازدا لە بەشی پێشبأكێی چوردەیەمین خولی فیستیڤاڵی نێونەتەوەیی فیلمی "بلاك" لە ئەڵمانیا نمایشكرا و توانی خەڵاتی سەرەكیی باشترین فیلمی ئەم فیستیڤاڵە لە نێوان 54 فیلمی ئەورووپی و ئەسیاییدا بەدەستبێنێت.
ئەم فیستیڤاڵە بە نمایشی كۆمەڵێك كورتە فیلمی چیرۆكی، ئەنیمەیشن، دیكۆمێنتی و ئەزموونی لە سینەماكارانی سەرتاسەری جیهان لە چەندین بەشی پێشبڕكێی و دەرەوەی پێشبڕكێی و هەروەها بەشی بەرهەمەكانی كۆمپانیای سینەمایی "ستاك فیلم"ی سنە لە رۆژانی 2 تا 8ی ئایار / مایۆی 2012 لە شاری
بەرڵین لە وڵاتی ئەڵمانیا و بە شێوەی هاوكات لە وڵاتی ئەمەریكا بەڕێوەچوو.
بەڕێوەبەرایەتیی راگەیاندنی گشتیی كورتە فیلمی "دەنگی باران".