وا پێدەچێت ڕۆژ بەڕۆژ جۆرج وسوفی گۆرانیبێژی لوبنانی هەوڵ بدات ئاستی جەماوەری خۆی كەم بكاتەوە، ئەویش ئەنجامدانی ئەو كارانەی كە جەماوەر توڕە دەكەن و دەبنە هۆی ئەوەی لێی دووركەونەوە. یەكێك لەو كارانەی بەم دواییە جۆرج وسوف ئەنجامیدا و بووە هۆی توڕەبوونی جەماوەر، سەردانی كۆشكی كۆماری سوریا و چاوكەوتنی بوو بە بەشار ئەسەد دوای ئەوەی چەند ڕۆژێكی لەگەڵ دایك و باوكی خۆی بەسەر برد لەشارۆچكەی كەفرون لەناوەڕاستی سوریا.
بەپێی چەند سەرچاوەیەك چاوپێكەوتنی بەشار ئەسەدی سەرۆكی سوریا و جۆرج وسوف زیاتر لەیەك كاتژمێری خایاند و بەشار ئەسەد هەواڵی تەندروستی وسوفی پرسی، ئەویش لەلایەن خۆیەوە وسوف جارێكی تر پاڵپشتی و پشتگیری خۆی بۆ ئەسەد دووبارە كردەوە، ئەمەش بووە هۆی بێزاری و توڕە بوونی جەماوەرەكەی، شایەنی وتنە لەگەڵ دەستپێكردنی شۆڕشی گەلی سوریا جۆرج وسوف سروودێكی پێشكەش بە بەشار ئەسەد كرد و ئەوكات ئۆپۆزسیۆنی سوریا و شۆڕشگێڕان ڕەخنەیەكی زۆریان ئاراستەی كرد.