بەبۆنەی جەژنی جیهانی باوكەوە، بیونسیی گۆرانیبێژی جیهانی بڕیاریدا دیارییەكی بەنرخ پێشكەش بەجای زی باوكی كچەكەی بكات كە بووە مایەی سەرسوڕمانی زۆر لەهاوڕێ و كەسانی نزیكی هەردوولا.
سەرچاوەیەكی نزیك لەهەردوو هاوسەرەكە بەماڵپەری(دایلی ستار)ی ئینگلیزی راگەیاند بەبۆنەی جەژنی جیهانی باوكەوە بیونسی بڕیاریدا فڕۆكەیەكی تایبەت پێشكەش بەجای بكات كە نرخەكەی دەگاتە 40 ملیۆن دۆلار، بیونسی ئەوەشی راگەیاندووە كە ئەمە باشترین دیاریە بەم بۆنەیەوە پێشكەش بەجای بكات، چونكە باوكێكی زۆر میهرەبانە و ئەركی باوكایەتی زۆر بەباشی بەجێ دەگەیەنێت و نموونەی باوكێكی دڵسۆزە.
سەرچاوەكە ئەوەشی راگەیاند ئەم فڕۆكەیە لەژوورێك پێكدێت كە لەپێست دروستكراوە لەگەڵ چێشتخانەیەك و ژوورێكی نووستن و دوو دەستشۆر، هەروەها فڕۆكەكە شوێنی زیاتر لە15 كەسی تێدا دەبێتەوە و بیونسی ئەمەی زۆر بەگونجاو زانیوە بۆ ئەوەی لەگەڵ هاوسەرەكەی لەگەشتەكانیاندا بەیاوەری خێزانی هەردووكیان و دۆستە نزیكەكانیان بەكاری بهێنن.