بە ئامادەبوونی هەزاران هاووڵاتی و ئەستێرە ناودارەكانی هونەر لە میسر، تەرمی گۆرانیبێژی ناودار (وەردە جەزائیری) لە مزگەوتی (سەلاحەدین ئەیوبی) لە قاهیرە بۆ جەزائیر بەڕێ كرا.

زۆربەی ئەو هونەرمەندانەی لە مزگەوتی ناوبراودا ئامادە بوون، بە چاوی پڕ فرمێسك و حەسرەتێكی قووڵەوە لە تابووتەكەیان دەڕوانی و باسی ئەوەیان دەكرد، كە هاوڕێیەكی دێرین و ئەستێرەیەكی ناوداری گۆرانیی عەرەبی ماڵئاوایی لێ كردین. لەو گۆرانیبێژە هەرە ناودار و بەناوبانگانەی كە بە كوڵ بۆ (وەردە) دەگریا (هانی شاكر) بوو.

(وەردە) جەزائیری یەكێكە لەو گۆرانیبێژانەی لە ساڵانی حەفتا و هەشتایەكاندا شان بە شانی (كلسوم و مەیادە و فەیروز) ناوبانگەكەی هەموو دنیای عەرەبی تەنیبوو و زۆرترین جەماوەریشی هەبوو، بۆیە كاتێك ماڵئاوایی لە ژیان كرد، حكوومەتی جەزائیر بڕیاری دا، لە گۆڕستان (جیهانی) بینێژن، كە یەكێكە لەو گۆڕستانانەی تەنیا سەرۆك و كەسە ناودارەكانی جەزائیری لێ دەنێژرێن.

ئەوەی جێگەی ئاماژەیە (وەردە جەزائیری) لە تەمەنی 73 ساڵیدا ڕۆژی پێنجشەممە بە سەكتەی دڵ ماڵئاوایی لە ژیان كرد.