هونەرمەند شەریف قەیران پێیوایە كە وەرزش زۆر گرنگە بۆ هەر كەسێك بەتایبەتی بۆ هونەرمەند، چونكە دەبێتە هۆی ئەوەی چوست و چالاك بێت، قەیران كە بەر لەماوەیەك بەسەردانێكی هونەری لەشاری هەولێر بوو لەلێدوانێكیدا بۆ گۆڤاری گوڵان وتی: من پێشتر یاریزانی تۆپی پێ بووم و یەكێك بووم لەیاریزانە هەرە باشەكانی تیپەكەی خۆمان و ئەگەر بەردەوام بومایە لەسەر یاریكردن، ئەوا ئێستا یەكێك دەبووم لەیاریزانە پیشەگەرەكان، بەڵام هونەر وموزیك بوونە هۆكاری ئەوەی كە لەتۆپی پێ دووركەومەوە.
قەیران هەر سەبارەت بەوەرزش دەڵێ: ئێستاش كاتم هەبێ بەبەردەوام سەیری یارییەكان دەكەم و یارییە خۆشەكان لەدەست خۆم نادەم تەنیا ئەگەر لەسەفەرێك بم یان نەتوانم سەیریان بكەم.
قەیران دەربارەی خۆشەویستیش وتی: بێگومان وەك مرۆڤێك لەژیاندا خۆشەویستیم كردووە، چونكە ژیان بێ خۆشەویستی ئەگەر مەحاڵ نەبێت ئەوا زۆر سەختە، بەڵام تێیدا سەركەوتوو نەبووم، چونكە بێ وەفا دەرچوون بەرامبەرم، بۆیە زۆربەی گۆرانییەكانم ئەوانەی خەمیان پێوە دیار بووە ڕەنگدانەوەی ناخی منن.