بەبیرم دێ منداڵ بووم وێنەیەكی جوان لەژووری ماڵەوەمان هەڵواسرابوو، هەموو جارێك سەیری وێنەكەم دەكرد كە وێنەی كچێكی جوان بوو، ئەو كات نەمدەزانی ئافرەت و كچ یان كچ و ژن لێك جیا بكەمەوە، بەڵام وێنەكە زۆر جوان بوو سەرنجی ڕادەكێشام.
رۆژێكیان بەباوكم وت: بابە ئەو ڕەسمە هی كێیە؟ باوكیشم بەڕەحمەت بێت بەزەردەخەنەوە وتی: ئەوە ڕەسمی دایكتە بەر لەوەی بیهێنم، منیش پێم سەیر بوو، چونكە شێوەی وێنەكە و فەیسی كچەكە لەفەیسی دایكم نەدەچوو، ئەو مەسەلەیە هەر لەمێشكم دەخولایەوە، جارێكی دیكە بەباوكم گوتەوە ئەو وێنەیە زۆر جوانە لەدایكم ناچێ، باوكم گوتی: بەڕاستمە باوەڕ بكە دایكتە پێشتر بەكچێنی زۆر جوانتر بوو عاشقی ببوم، منیش باوەڕم كرد، كات ڕۆیشت و ڕۆژێكیان لەپلكم پرسی كە دەكاتە خوشكی باوكم: پلە دایكم بەكچێتی زۆر جوان بووە باوكم وێنەشی هەڵواسیبوو لەژوورەكەمان، بەڵام من وا هەست ناكەم وێنەی دایكم بێت، چونكە قەت لێكناچن، پلكم سەیری وێنەكەی كرد كە وێنەی (كچی كافرۆش) بوو گوتی: كوڕم باوكت گاڵتەت لەگەڵ دەكات ئەوە وێنەی كچی كافرۆشە، منیش گوتم: كچی كافرۆش! كافرۆش كێیە، ئەویش بۆی گێڕامەوە كە داستانێك لەپشت ئەم وێنەیە ڕاستەقینەیە، كچی كافرۆش كچە كوردێكی زۆر جوان بوو كاتی خۆی ئەو زەمانە كە ئینگلیز لەكوردستان بوونە جوانیی ئەو كچە سەرسامی كردوون دواتر ڕفاندوویانە بۆ ئینگلستان و نازانرێ چی بەسەر هاتووە، هەندێك دەڵێن ژەهر خوارد كراوە و هەندێكی دەڵێن خۆی كوشتووە، باوكیشی كە كا فرۆش و هەژار بوو لەخەفەتی ڕفاندنی كچەكەی مردووە، گوێبیستنی ئەم داستانە و بەردەوام بینینی وێنەی كچی كافرۆش لەژووری ماڵەكەمان لەتەواوی سەردەمی منداڵیمدا خەیاڵێكی سەیری لا دروستكردم، بەڵام تا ئێستا لەبەر سەرقاڵی و جەنجاڵی ژیان ئەو خولیا و خەیاڵەی منداڵیم كزبوونەتەوە.
ئەوەی لێرەدا مەبەستمە بەگێڕانەوەی ئەو سەربوردەیەی منداڵیم تێكهەڵكێشەیەك بكەم لەنێوان (كچی كافرۆش) كە دەكرێ بەمۆنالیزای كورد وەسف بكرێ هەروەك چۆن خاتوو تامان شاكر ئەو وەسفەی بۆ كرد لەكاتی هاتنی وەفدی میسری بۆ كوردستان لە وۆرك شۆپی سینەمای میسری بۆ كوردستان، لەگەڵ پرۆژەی سینەمایی هونەرمەند (تەنیا كەریم) كە دەیەوێت ئەو تابلۆیە و سەربوردەی دا‌ستانی دواوەی تابلۆكە بكاتە فیلمێكی سینەمایی كوردی.
من هەر لەسەرەتا كاتێك تەنیا پێوەندی پێوە كردم و بۆ پڕۆژەكە بۆم دوا من دەستخۆشیم لێكرد، بەڵام پێشمگوت ئەم كارە وا سانا نییە پڕۆژەیەكی گرنگ و قورسه و گرنگییەكەی لەدەستنیشانكردنی ئەو كچەیە كە ڕۆڵی پاڵەوانێتییەكە دەبینی. تەنیا لەوه پەلەمەكە كە كچەكە بدۆزیتەوە، جگە لەمە هەر كارێك لەبنەڕەتەوە لەتابلۆیەك ئیلهام وەردەگرێ هەرچەندە داستانێك لەدوای تابلۆیەكەشەوەیە، بەڵام دەبێ ئەو كارە كارێكی شێوەكاری و هونەری ڕەنگ ئامێز بێت، دیمەن و گرتە و وێنەكانی لەتابلۆی هونەری بچن(ئەتفۆسمێر)ی كارەكە باكگراوەندێكی هونەری خەیاڵبەخشه بەبینەر ببەخشێت، دەبێ كارەكە ڕاوێژكاری شێوەكاری و هونەرمەندانی شێوەكاری و ڕاوێژی هونەری و مێژوویی بەشدار بن، بەتایبەتیش لەڕووی دیكۆر و جلوبەرگەوە، ئەم فیلمە دووبارە داڕشتنەوەی(تابلۆ) سەرەكییەكە لەچەندین وێنەو تابلۆی جیاجیای هونەریدا كە لەئاكامدا دەبێتە تابلۆیەكی سینەمایی.
هەرچەندە ئەو داستانەی لەدواوەی ئەو تابلۆیەشن ڕەنگە پتر نەخشانە بێ، چونكه لەهەر شوێن و جێگایەك تەفسیری جیاجیای بۆ كراوە هیچ دەقێكیش نییە تەواو و ڕاستگۆیی ئەو داستانە بسەلمێنێت، بەڵام ئەوەیان ڕەنگە ئەوەندە گرنگ نەبێ. گرنگ ئێمە هێڵێكمان هەیە كاری لەسەر بكرێت كە كەسایەتی كچەكە و جوانیی و كاریگەری تابلۆكە و بەشێكی بەسەرهاتەكەیه، دەكرێ خەیاڵ و ئەندێشەی دەرهێنەر و سینارێست گۆڕانكاری بەسەردابێت، گرنگ ئەوەیە لەبنەڕەتدا كارێكی هونەری دیار و قەشەنگ بەرهەم بێت.
بەرهەمهێنانی ئەم پڕۆژەیەش لەو كات و ساتەدا كارێكی گرنگ و ستایلی سینەمای كوردی دەگۆڕێت و جگە لەوەی كە كارەكه پڕۆژەیەكی هونەری جوانیشە لەهەمان كاتدا فیلمەكە بینەر و بازاڕێكی باشی ناوخۆیی چاكی دەبێت كە ئەمەشیان خاڵێكی هەرە گرنگی سەركەوتنی سینەمای كوردییە لەو سەردەمە هەنووكەییەدا، پێموایە ڕەنگدانەوەیەكی زۆر باشی بەسەر ڕەوتی فیلمسازی سینەمای كوردییەوە دەبێت بەمەرجێك پەلەی لێنەكرێت و بەهێمنی كاری تێدا بكرێت.