هونەرمەند حەمە رەئوف كەركوكی رایگەیاند بە نیازە لە ئایندەیەكی نزیكدا بە بەشداری چەند هونەرمەندێكی دیكە كۆنسێرتێكی گۆرانی لە شاری سلێمانی ساز بكات.
حەمە رەئوف دەربارەی ئەو كۆنسێرتە زیاتر گوتی: كۆنسێرتە لەلایەن بەڕێوەبەرایەتی كەلەپوری كوردی ئەنجام دەدرێت بەبۆنەی رۆژی جیهانی مۆسیقاوە و هەر یەكە لە هونەرمەندان ئاڤان جەمال و سوارە محەمەد و مەحمود محەمەد بەشداری تێدا دەكەن، گۆرانییەكانیش لەشێوەی ئەو كۆنسێرتانە دەبن كە تا ئێستا بە هاوبەشی لەگەڵ هونەرمەند ئاڤان جەمال پێشكەشی كردوون.
سەبارەت بە بەرهەمی داهاتووشی گوتی: بێگومان هونەرمەند هەمیشە بیر لە بڵاوكردنەوەی بەرهەمی نوێ دەكاتەوە، بەڵام ئێستا هیچ شتێكی وا نییە كە شایەنی باس كردن بێت، بەڵام لە كاتی خۆیدا هەر شتێكی نوێ هەبێت رایدەگەیەنم.