هونەرمەندانی كورد وەك پێویست ناوبانگیان دەركردووە؟
![هونەرمەندانی كورد وەك پێویست ناوبانگیان دەركردووە؟](https://gulanmedia.com/public/old_images/topics/honarmandkurdwak.jpg )
سەبارەت بەم پرسە هونەرمەند حەسەن شەریف بەمشێوەیە رای خۆی دەربڕی: بە ڕاستی ئەمە بابەتێكی گرنگە، بەڕای تایبەتی خۆم هۆكارەكەی دەگەڕێتەوە بۆ لایەنە سیاسییە كوردییەكان، چونكە بۆ ماوەیەكی زۆر بوو لە ئەوروپا ئەو ئاهەنگ و كۆنسێرتانەی كە ساز دەكران راستە هونەرمەندەكان كورد بوون، بەڵام دوو دیالیكتی پێوە دیار بوو بەجۆرێك هەستت دەكرد كە هونەرمەندێكی دهۆك رەنگە وەك پێویست لای خەڵكی هەولێر و سلێمانی ناسراو نەبێت و بەپێچەوانەشەوە، ئێستا ئەم دیاردەیە خەریكە نامینێت.
ناسراو بوونی هونەرمەندانی كورد لە دەرەوەی سنوورەكانی كوردستان كارێكی زۆر پێویستە، بەڵام ئەمەش پەیوەستە بە خۆشەویستی و رێز گرتنی میللەتی كورد لە هونەرمەندانی خۆی، بۆچی تا ئێستا هونەرمەندانی ئێمە ناوبانگیان نییە، دەتوانم دەیان هونەرمەند بە نموونە بهێنمەوە كە دەتوانن لە هەموو پارچەكانی كوردستان و لە دەرەوەی كوردستان ئاهەنگ و كۆنسێرتی گەورە ساز بكەن، بەڵام ئەو گرنگی و بایەخ پێدانەی لایەنە پەیوەندارەكانی كوردستان بە خەڵكانی بێگانەی دەدەن بە هونەرمەند و كەسایەتییە ناودار و ناسراوەكانی كوردی نادەن، ئێمە لێرە هەوڵی زۆرمانداوە كە جگە لەوەی كوردەكان فێر بكەین گوێ لە هونەر و مۆسیقای رەسەنی خۆیان بگرن، لە هەمانكاتدا كارێكی وا بكەین بیانییەكانیش گوێ لە هونەری ئێمە بگرن و ئاشنا بن پێی، هەروەها هەوڵمانداوە هونەرمەندی كورد لای خەڵكەكەی خۆشەویست بێت و ئیدی لە چوارچێوەی پروپاگەندە دەربچن، بەڵام بەداخەوە دیسان دەیڵێمەوە لەبەر بەرژەوەندییە تەسكەكان نەتوانراوە ئەو كارە وەك پێویست بكرێت، من وەك حەسەن شەریف هەست دەكەم ئەو كۆتەم شكاندووە، بۆ من هیچ جیاوازییەك نییە، هەوڵ دەدەم بە دەنگی خۆم دڵی هەر دایك و كۆرپەیەكی كورد خۆش بكەم.
هونەرمەندی گۆرانیبێژی ناوچەی بادینان (هەڤاڵ ئیبراهیم) لەمبارەیەوە بەم شێوەیە هاتە ئاخاوتن و گوتی: (پێموایە تا ئێستا هونەرمەندانی كورد، لە %70 سوودیان لە ناوبانگی خۆیان وەرنەگرتووە، چونكە هونەرەكەمان نەگەیشتۆتە ئەو ئاستە، جگە لەوانەش هونەرمەندانی ئێمە تا ئێستا ئەو ئاستە هونەرییان نەبووە بتوانن بازاڕێك بۆ خۆیان پەیدا بكەن، من وەك ( هەڤاڵ) تا ئێستا هیچ سوودێكم لە ناوبانگی خۆم وەرنەگرتووە).
هونەرمەندانی كورد پێویستە دوورنەبن لە جەماوەر و ناز نەكەن و پێویستە لە پڕۆگرامە هونەریەكان و لێدوان بۆ رۆژنامەكان خۆیان بەدوور نەگرن، چونكە ئێمەی هونەرمەند بە جەماوەر و گوێگرانی هونەرییەوە جوانین، ئەگەر ئەوان نەبن ئێمە گۆرانی بۆ كێ دەڵێن؟!.
هەڤاڵ ئیبراهیم دەربارەی هەبوونی بەڕێوەبەری كاری هونەری بۆ هونەرمەند تا چەند پێویستە دەڵێت: پێموایە هەبوونی بەڕێوەبەری كاری هونەری بۆ هونەرمەندان كارێكی پێویستەو ئەتەكێتی رێكخستنی كارە بۆ هونەرمەندەكە، بەڵام پێموایە هونەرمەندێك ئەگەر ئەوەندە ناوبانگ و بەرهەمی چاكی هونەری نەبێت بەڕێوەبەری هونەری بۆچییە، بەڵام بەداخەوە لای ئێمە هەندێك گۆرانیبێژ بەڕێوەبەری كاری هونەریان بۆ خۆیان داناوە كە هەر پێویست ناكات، جگە لەوەش وای لێهاتووە كەسێك وەڵامی تەلەفۆنی هونەرمەندەكە دەداتەوە دەڵێ فەرموو من بەڕێوەبەری كارە هونەرییەكانی ئەو هونەرمەندەم، ئاخر لە هەموو دونیادا بەڕێوەبەری كاری هونەری كاری ئەوە نییە، بەڵكو ئیش و كاری بەڕێوەبەری كاری هونەری بریتییە لە رێكخستنی كارە هونەرییەكانی ئەو بۆندانەی بۆ ئەلبوم و كلیپەكانی دەكرێت، یا سازدانی كۆنسێرتەكانی، بۆیە پێموایە ئیش و كاری بەڕێوەبەری كاری هونەری پێویستە دیار بێت، ئەگەر پێویست بكات هونەرمەندەكە هەیبێت.
هونەرمەند لوقمان سەلیم وتی: خۆی ئەمە دیاردەیە بۆتە دیاردەیەكی چاولێكەری لەنێوان هونەرمەندانی كورد كەچاو لە هونەرمەندانی تورك و فارس و عەرەب دەكەن، دەتوانم بڵێم ئەم دیاردەیە لەزۆربەی وڵاتەكان هەیە . ئێمەش حەز دەكەین هونەرمەندمان هەبێت بەناوبانگ بێت لەنێو خەڵك، بەڵام بەناو بانگییەكەكەی لەسەر ئاستی هونەرەكەی بێت نەوەك ناوەكەی بۆش بێت. دەبێت هونەرمەند زیاد لەپێویست خەمی هونەرەكەی بخوات نەوەك ناوبانگی بتوانێت ژێرخانی هونەرەكەی بەرەو پێش ببات من لەگەڵ ئەوەنیم بەتەنیا بۆناوبانگ كاری هونەری بكرێت چونكە لەئایندە بەرپرسیاردەبێت بەرامبەر بەهونەرەكەی خۆیەوە.
لوقمان دەڵێت (سەیرم پێدێت ڕێزم هەیە بۆ ئەوهونەرمەندانەی كەئێستا لەم شێوەیان هەیە بەڵام زیاتر ئەم دیاردەیە بۆتە چاولێكەری بەڕای من بوونی بەڕێوەبەری كار هێشتا زووە بۆ هونەرمەندانی ئێمە).
هونەرمەند تارا ڕەسول دەڵێت: ئەو هونەرمەندانەی كە بەشێوەیكی كاتی ناوبانگیان هەیە بەوانە ناڵێین هونەرمەند . بەڕاستی ئەگەر هونەرمەند بی لەوكاتە دەست پێدەكەی تاژیانت مابێ لەتوانات هەبێ كاری هونەری بكەی. بەداخەوە لە لای ئێمە ئەم شتانە زۆر كەمە لەڕاگەیاندنەكان بەهەموو كەسێك دەڵێن هونەرمەند، كەسەكە هێشتا گۆرانی نەوتوە دەڵێن پرێس كۆنفراسی هەیە، بۆیە من بەو جۆرە هونەرمەندە كاتیانە ناڵێم هونەرمەند. لەكوردستان بواری گۆرانی ووتن زۆر هەژارە، بۆیە هەموو كەس پێی دەوێرێت هەركەسە لەلای خۆیەوە گۆرانی دەڵێت. زۆرجار شەرم دەكەم بڵێم گۆرانیبێژم، چونكە بە ڕاستی گۆرانیبێژی زۆر خرا پ هاتۆتە نێو دونیای هونەری، ئێستا كۆمەڵێك هونەرمەند هەن من حەز ناكەم قسەیان لەسەر بكەم . ئەو هونەرمەندانەی كە كاتین تا ئێستا نازانن بەڕێوەبەری كار چییە تەنیا تەلەفۆنێكیان هەیەو دەیدەنە دەست كەسێكی تر. خۆی بەڕێوەبەری كار شتێكی زۆر باشە هەتبێ چونكە ئێستا كەسی زۆر بێ ئەزموون هەن لە بواری هونەری ڕاگەیاندن كار دەكەن بۆیە پێویستە یەكێك هەبێت كارەكانت بۆبكات بەس دەبێت كەسێكی شارەزابێت.
هونەرمەندی موزیكژەن سەید ئەحمەد رەواندزی دەڵێت: زۆرن ئەو هونەرمەندانەی ئەمڕۆ لە بواری گۆرانیدا كار دەكەن بۆ خزمەتكردن بە هونەری كوردی كار دەكەن، بەناوبانگی هونەرمەند و كار كردن بۆ پەیدا كردنی ناوبانگ دوو شتی لە یەكتر جیاوازن، هەندێك لە گۆرانیبێژانمان هەیە گەیشتوونەتە لۆتكەی داهێنان، ئەمانە بە كارە جوانەكانی خۆیان لەسەر ئاستی هەر چوار پارچەی كوردستان ناسراون و وایانكردووە كە گۆرانییەكانیان لەناو خەڵك بە زیندوویی بمینێتەوە، بەڵام بە داخەوە هەندێك لە گۆرانیبێژانمان بەتایبەتی گەنجەكان تەنیا دوو گۆرانیان هەیە، دەبینی جامی ئۆتۆمبیلەكەی رەش كردووە و بەڕێوەبەری كاری بۆ خۆی داناوە، ئەگەر كەسێك تەلەفۆنی بۆ بكا رەنگە خۆی وەڵام نەداتەوە، ئەمە جۆرێكە لە (لەخۆبایی بوون) و بەو كارەی دەیكەن ناز بەسەر خەڵكەوە دەكەن و جۆرێكە لە لوتبەرزی و جیاكردنەوەی خۆیانە لە خەڵكانی تر، بەجۆرێك هەندێكیان لە ماڵیش نایەنە دەرەوە، بەپێچەوانەوە ئەگەر مرۆڤ چەند زانیاری و زانستی زیاتر بێت لە بواری گۆرانی و مۆسیقا دەبێ زۆر بە سادەیی و ساكاری هەڵسوكەوت لەگەڵ خەڵك بكات و زیاتر بچێتە ناو خەڵك، ئامۆژگاریم بۆ ئەوانەیە كە زیاتر بچنە ناو خەڵك تاكو خۆیان زیاتر رۆشنبیر بكەن و زانیاری وەربگرن و لە ئاهەنگ و كۆڕ و كۆبوونەوەكاندا بەشدار بن، دانانی بەڕێوەبەری كار بۆ ئەم هونەرمەندانە بەكارێكی نەشیاو دادەنێم، ئەو هونەرمەندە پێویستی بە بەڕێوەبەری كار هەیە كە سالانە 10 كۆنسێرتی هەبێت رەنگە لەبەر سەرقاڵ بوونی نەتوانێت خۆی گشت كارەكانی خۆی بەڕێوە ببات ئەو كات كەسێك دادەنێت كە كارەكانی بۆ ئەنجام بدات و كار ئاسانی بۆ بكات، یان ئەو هونەرمەندانەی زیاتر لە كارێك ئەنجام دەدەن.