ئەكتەرەكان ئاستی داهێنان و شكستیان لە بەرهەمێكەوە بۆ بەرهەمێكی تر دەگۆڕێت، بۆیە ناكرێت تۆ هەڵسەنگاندنت بۆ ئەكتەر لەسەر كەسایەتی ئەكتەرێك بێت كەبە ئەكتەرێكی سەركەوتوو ناوزەد كراوە یا ئەكتەرێكی تر بە فاشیل، بەڵكو دەبێت لەسەر بەرهەم بێت چونكە هەر بەرهەمەو كێش و سەنگی خۆی هەیە، رەنگە لە هەلو مەرجێكی دیاریكراودا كۆمەڵێ فاكتەری یاریدەدەر هەبن بۆ سەركەوتنی بەرهەمێك، كە ئەو فاكتەرانە لە بەرهەمێكی دیكەدا نەبن، وەك نواندن لە سەر دەستی دەرهێنەرێكی بەتوانا، یا تێكستێكی سەركەوتوو كە ئاوێتەی دەرهاوێشتەكانی سەردەم و كۆمەڵگا بێت، یا كەشو هەواو باری دەروونی ئەكتەر، یا هەر هۆكارێكی دیكە كە زۆر جاران بە رێكەوت دروست دەبن و ڕەنگە كەم رێ بكەوێت جارێكی دیكە بڕەخسێتەوە، زۆر جاران هەندێ بەرهەمی سەركەوتوو دەبنە مۆرك و ناونیشانی ئەكتەرێك كە رەنگە بە ئاسانی لە هزرو خەیاڵی بینەردا كاڵ نەبنەوە، تا داهێنانێكی گەورەتر لەوەی یەكەمیان بە دەست نەهێنێ، بۆیە ئەو خاڵی داهێنانە لەبەرهەمێكی سەركەوتوودا دەبێتە پێوەرو لەهەر بەرهەمێكی دیكەدا ئەو ئەكتەرە ببینێ ئەو خاڵی داهێنانەی بە بیردا دێتەوەو بەراوردی پێ دەكاتەوە، وەك بەراوردی شانۆیی (مەرگ و كچ ) لە گەڵ ژنەكەی ئەو ماڵە كە . بێگومان مەبەستم لە قەدگرتن نییە بە ستایلێكی دیاریكراو، یا پەیوەست بوون بە دەرهێنەرێك، چونكە گۆڕینی ستایل و شێوە و دەرهێنەر كاری ئەكتەری سەركەوتووە، بەڵكو مەبەستم لە دەسەڵاتی ئەكتەرو تێپەڕاندنی توانایەتی .
تەلار لەو میلۆدرامایەدا پاڵەوانێكی لیبۆكە زێتر لەوەی ئەكتەرێكی شانۆیی بێت، ئەگەرچی لیبۆكەكانیش ئەكتەری كۆمیدین، بەڵام بە شێوازێكی تایبەت كە ئامانجی سەرەكییان دروست كردنی كۆمیدیایە، چ لە نواندن دا چ لە شێوەو جلو بەرگدا، دیارە كە جیاوازییەكی زۆریش هەیە لە نێوان كۆمیدیای شانۆیی و كۆمیدیای لێبۆكەكان، لە ڕووی بزووتنەوەو ئەداو دەنگ و دیالۆگەوە، بۆیە زۆر جاران كە هەموو ئامانجەكان لە شانۆدا دەڕژێنە نێو فەلسەفەی تەنیا بەپێكەنین هێنانی سواو دەڵێن ئەم ئەكتەرە ئەكتەری كۆمێدیا نییە بەڵكو لیبۆكە . من وای دەبینم كە چەند ئەوەندەی بۆ لیبۆكێك سەخت بێت ببێتە ئەكتەرێكی شانۆیی دروست، لە هەمان كاتیشدا بۆ ئەكتەرێكی شانۆییش سەخت و دژوار بێت ببێت بە لیبۆك، مەبەستم ئەوەیە خۆ لێدانی تەلار لە بوونە لیبۆك رەنگە ئەزموونێكی ئاسان نەبووبێت، چونكە ئەو ستایل و ئەزموونە لە شانۆی ئێمەدا كەم پیادە كراوە. لە هەموو حاڵەتێكدا دەبێت ئەو ئەزموونەی تەلار وەك خۆی تەماشا بكەین كە هەیە و بپرسین ئایا تەلار توانی ببێت بە لێبوكێكی سەركەوتوو ؟
بەر لەوەڵامدانەوەی ئەو پرسیارە هەندێ ئامانج هەبوون لە پاڵ هەڵبژاردنی ئەو تێكستە، یاخود شێلانی تێكستەكە بۆ دروست كردنی ئەو فۆرمە خوازراوەی ئێمە بینیمان لەوانە :
1. ختووكەدانی بینەر بە بەكارهێنانی هەندێ دەستەواژەو دیالۆگی سێكسی بەئامانجی وروژاندن،كە رەنگە بۆ بینەرێك كە كەپتی سێكسی هەبێت، بەشێوازێك لە شێوازەكان ببێتە هۆكار بۆ وروژاندن و بەجێ هێشتنی كاریگەری دەروونی .
2. خۆ ڕووتكرنەوەی هەندێ ئەندامی جەستەی ئەكتەر بە دروستكردنی هەندێ دیمەنی سێكسی و لە پێناو هەمان ئامانج دیسان سەرچاوەیەكی دیكەبوون بۆ وروژاندن،
3. هەوڵدان بۆ شەرم شكاندنی بینەر بەرامبەر بەو شەختە كۆمەڵایەتیانەی كە ڕووی راستی ئارەزووەكانی دەشارنەوە و گەڕانەوە بۆ هەقیقەتە مرۆییەكان، لە ڕێگەی وروژاندنی پرسیاری راستەخۆ لە بینەرو بە قسەهێنانی ..
4. بەپێكەنین هێنانی بینەر بەشێوەو دیالۆگ و مكیاج .
5. هەوڵدان بۆ بەشداری پێكردنی بینەرو ئاوێتە بوونی بەشانۆ وەك ئەكتەرێكی شانۆیی و دروست كردنی پرسیارێك كەوا لە بینەر بكات ببێ بەشێك لەشانۆگەرییەكە.
بەڵام تا چەند ئەو ئامانجانە كە تەلار كاری بۆیان كرد چوونە نێو چوارچیوەیەكی هونەری ؟ چەندیش چێژێكی رۆحییان بە بینەر بەخشی؟ بەشێوەیەك كە لە هۆڵەكەدا هاتە دەرەوە یا كاتێ شەو سەری خستە سەر سەرینەكەی كام لە دیمەنەكانی بە مێشكدا رابووردنەوە ؟ رەنگە ئێستاش دوای تێپەڕ بوونی چەند ساڵێك مەستی مەرگ و كچ بەری نەدابم . بەڵام هەر ئەوەندە دیمەن و چێژی نمایشی ژنەكەی ئەو ماڵە لە مێشكمدا مابوو تا لە دەرگای دەرەوەی هۆڵەكە چوومە دەرەوە ...
ئەو پرسیانەی تەلار بە شێوەیەك بینەری دووچاری تەنگەتاوی دەكرد، كە كرۆكی شانۆگەرییەكەو چێژی شانۆیی لە بیر بچێتەوە، یا كارێك بكات ریتمی شانۆگەرییەكە لە هزری بینەردا دابەزێنێ و جڵەوی خەیاڵی خۆی و جەمالیەتی شانۆگەرییەكەی لە خەیاڵدا بسڕێتەوە، من پێم وایە زۆر قسە هەبوون دەبوایە بە زمانی ئەدای شانۆیی و هێمای شانۆیی بەرجەستە كرابوونایە، ئەوەندەی تەلار پەنای بۆ دیالۆگی وروژێنەر دەبرد، ئەوەندە پەنای بۆ ئەداو بەرجەستەی جەستەیی نەبرد، ئەو كەمتر توانی زمانی جەستە بەكار بێنێ، بەقەد ئەوەندەی ویستی كەبتی سێكسی بینەر قۆرخ بكات، بەڵام ئایا ئەگەر ئەو دیالۆگ و نمایشە لە لایەن ئەكتەرێكی پیاوەوە بكرابوایە هەمان ئاستی دەبوو؟ ئێمەی بینەر بۆیە هاتبووینە شانۆگەرییەكە تا نواندنێكی هونەری ببینین، لە بری ختۆكە دانی بینەر .
تەلار وەك نواندن بە كەرەستە هونەری و جەستەییەكانی خۆیەوە كەمتر دەسەڵاتی ئەوەی هەبوو جیاوازی لە نێوان لیبۆكەكەو ژنەكەدا دروست بكات، هەموو پەنا بردنێكی تەنیا بە لووتە سوورەكەوە بوو، كە نەیدەتوانی ببێتە فاكتەرێكی جوداكاری لە نێوان ئەو دوو كەسایەتییەوە. بۆیە بینەر كەمتر دەیتوانی ئەو دوو كەسایەتیە لێكتر جودا بكاتەوە، وێڕای لاوازی لە دەنگ و بەجێ نەهێشتنی مەودای بێدەنگی و چێژ وەرگرتن لە كشوماتی ..لەو بەینەدا دەسەڵات پێشكانی ئەكتەرو زاڵ بوونی بەسەر توانستەكانی دەردەكەوێت،ئەگەر ئەكتەرێكی بەتوانا بێت، من لە گەشتەكەی حەسەندا زۆر سەرسام بووم بە كامەران رەئووف كە لە شانۆگەرییەكەداو لە یەك كاتتدا دەسەڵاتی ئەوەی هەبوو پێنج كەسایەتی بەیەكەوە نمایش بكات و بۆ هەر كەسایەتیەكیش رەسمی خۆی بكێشێ و هەر یەكێكیشیان جیاواز لەوی تریان، بەڵام بێ ئەوەی هەموو ئەو كەسایەتییە جیاوازانە ئاستی نواندنی كامەران وەك ئەكتەر دابەزێنن ..
تەلار وەك ئەكتەر توانستی خۆی هەیە، بەڵام گرنگ ئەوەیە دەرهێنەر چۆن دەتوانێت تەوزیفی ئەو توانست و جەستەیە بكات كە ئەكتەر هەیەتی، ئەو لەلای دەرهێنەرێكی وەك د. فازڵ لە مەرگ و كچ دا ئەكتەرێكی تر بوو، لە ژنی ئەو ماڵەش شتێكی ترە، مەبەستیشم لە گۆڕینی كەسایەتی و ستایل و شێوازی شانۆگەرییەكە نییە، بەڵكو مەبەستم لە توانست و ئەدای ئەكتەریی ئەوە، كە تێیدا دوچاری جۆرێك لە دابەزین هات بەپێچەوانەی چاوەڕوانی زۆرێك لەو بینەرانەی هێشتا كاریگەرییەكانی شانۆگەری مەرگ و كچیان لە مێشكدا هەر مابوو .
خۆ ئەگەرچی ناوێكی زلی دەرهێنان ( كارین باریستراند ) بە شانۆگەرییەكەوە نووساوە، كە جۆرێك لە ریكلامی شانۆیی دەنوێنێ، ئەگەرنا لە ڕووی دەرهێنانەوە شانۆگەرییەكە سادەیی و ڕووكەشییەكی زۆری پێوە دیارە و دەرهێنەر نەیتوانیوە وەك پێویست تواناو وزە هونەرییەكانی تەلار قۆرخ بكات، كە زۆر لەوەندە زێترە كە بینیمان، كەواتە من وای بۆ دەچم كە ئەو دەرهێنەرە زێدەكارییەكی نەخستۆتە سەر هونەری تەلار بە قەد ئەوەندەی كەمی كردۆتەوە .
نەك هەر لە ڕووی دەرهێنانەوە بگرە لە ڕووی تێكستیشەوە تەلار پرسێكی گشتی هەڵبژاردووە (خیانەتی هاوسەران ) لە كاتێكا ئەو جۆرە كێشە كۆمەڵایەتیە شتێكی باوو سواوەو لە هەموو كۆمەڵگاكانی دنیادا هەیە و پانتاییەكی ئێجگار فراوان لە ژیانی كۆمەڵگاكاندا داگیر دەكات، ئەوەی كە هونەرە ئەوەیە كە ئێمە چی لە ناو ئەو هەزاران كوێرە گرێیانەی ناو خیانەتدا هەڵبژێرین كە دوور بێت لە خیتابیەت و بە زمانی هونەر بەرجەستە بكرێت، دوورلە زمانی هونەریش هێز زمانێكی دیكەی ئەو كاریگەرییەی لە شانۆدا نابێت بۆ گەیاندنی پرسێك، ئەوەتا لەو بەینەدا پرسیارێك ڕوو بە ڕووی بینەر دەبێتەوە ئەویش ئەوەیە ئایا دوور لە لایەنە هونەرییەكان پرسی خیانەت هیچ كاریگەرییەكی جێهێشت لە هزرو دەروونی بینەردا،یان هەر تەنیا پرسێكی راگوزارو كاتی بوون و هیچ شوێنەوارێكی دەروونییان بەجێ نەهێشت لای بینەر؟ بۆیە من پێم وایە پرسە سێكسیەكە وای كردبوو پرسە بنەڕەتیەكەشی شاردبۆوە.