بڕیار وایە فیلمی سینەمایی «ماندوو» یەكەمین بەرهەمی دەرهێنەری مەهابادی «ئیبراهیم سەعیدی» لە بەشی كێبڕكێی سەرەكی بیست و هەشتەمین خولی فیستیڤاڵی نێونەتەوەیی فیلمی «میامی» لە وڵاتی ئەمریكا دەچێتە سەر پەردەی سینەما و بۆ بەدەستهێنانی خەڵاتی سەرەكیی ئەم فیستیڤاڵە لەگەڵ چەندین فیلمی دیكە لە وڵاتانی جۆراوجۆری جیهان ركابەری دەكات.

ئەم فیستیڤاڵە بە بەشداریی فیلم گەلێك لە بەرهەمەكانی دەرهێنەرانی سەرانسەری جیهان لە بەشە جۆراوجۆرەكاندا لە رۆژانی 4 تا 13ی مارسی 2011 لە شاری مەیامی لە ویلایەتی فلۆریدا لە وڵاتە یەكگرتووەكانی ئەمریكا بەڕێوەدەچێت.

فیلمی «ماندوو» لە دوایین نمایشی نێونەتەوەیی خۆیدا لە رۆژی 1ی مارس لە خولی فیستیڤاڵی نێونەتەوەیی فیلمی «بێلگراد» لە هۆڵی سینەمایی ناوەندی فەرهەنگی شاری بێلگراد لە وڵاتی سێربستان چووە سەر پەردەی سینەما.

شایەنی باسە 39مین خولی فیستیڤاڵی نێونەتەوەیی فیلمی «بێلگراد» رۆژی 26ی فێبرییە و لە شاری بێلگراد دەستی پێكردووە.