((میلێن)) خانمە ئەكتەرێكی ناوداری جیهانیە، كاتێك دیمانەم لەگەڵ (هونەرسەلیم) دەسازاند بەڕێزی پێمی وت ئەكتەری ناوبراو لە فیلمێكی كوردی ــ فەرەنسی ڕۆڵی كارەكتەرێكی پێدراوە، وادیارە رۆڵەكە لەگەڵ سایكۆلۆژیاو چركەساتەكانی ژیانی ویدا گونجاوە شەوەكەی كاتژمێر نۆو چواردە دەقیقە، من و هونەر لەو ئەسانسێرەدا بووین كە سەردەكەوت بۆ لای میلێن، كە گەیشتینە بەر دەرگا بە ساج دروست كراوەكەی ماڵیان لەسەر دەرگاكە نووسرابوو (( بە پێكەنین وەرە ژوورەوە رەنگە وێنەت بگیرێت ..)) ماڵێك پڕی لە مۆم و تابلۆو موورو كتێب و سەرو بنی دیوارەكانی دار گوێزو بۆنی بوغوردو ساج بوو، سەرجەم كتێب و كتێبخانەی شەخسی (جۆرج سیمینۆن)ی تێدا پارێزراو بوو، هەندێ لە تەختەو دارەكان مێژوویان بۆ دووسەدو پەنجا ساڵ لەمەوبەر دەگەڕایەوە، كەچی تۆزقاڵێك چییە نەڕووشابوون و تۆزێكیان لێنەنیشتبوو، میلێن بەدەم دروست كردنی شەرابێكی كۆنی پاریسیانەوە باسی لە حیكمەتی پاراستنی كەلوپەلی دانسقەی بۆ دەكردین هەموو ئەلبوم و دۆسیەو ژیاننامەو دیدار و هەواڵی فیلمەكانی لە ناو دۆسیەكانی كونجی كتێبخانەیەكدا هەڵگرتبوو، تابلۆیەكی بە گرافیك دروستكراوی (بیكاسۆ ) كە نوسخە ئۆرژیناڵەكەی بوو، بە ژوورسەرمانەوە هەڵواسرابوو،وادیارە پێشكەشی ئەم خانمە ئەكتەرە كرابوو، لەم ماڵەی میلێندا بۆم دەركەوت كە ژیانی ئاسایی رۆژانە و كاری هونەری یەك تەنن، بەر لەوەی بێینە لای وی بە تەنیشت ئەو شوقەیەدا تێپەڕیم كە (دالیدا)ی گۆرانیبێژ تێیدا كۆتایی بە ژیانی خۆی هێنابوو، دالیدا بە لوتكەی نائومێدی گەیشت، بەڵام میلێن حەفتاو پێنج ساڵی تێپەڕاندووەو خەندەكانی سفت و سافن وهەر بە ئومێدەوە لە ژیان دەڕوانێت، گەرچی بایكۆتی خستنەوەی مناڵیشی كردووە، كەچی فیلمەكانی ئەو منداڵە شیرینانەی خۆیین كە دەیلاواننەوە، نامۆترین شتێك لە گەشتەكەی پاریسمدا دیتبم لەم ماڵەدابوو، كە لەوانەیە بەلای میلێنەوە ئاساییترین شتێك بێت، چونكە ئەو نغرۆی ناو كارە جدییە هونەرییەكانی خۆیەتی و هەموو شتێكی ناوازەو جوانی خۆی لە بینەرانی نەشاردۆتەوەو لە ماڵەكەشیدا شتی شاراوەی نەبوو، بۆ نیو دەقیقە چوومە توالێت، پڕی لە تابلۆی نیگارسازانی جیهانی بوو، پڕی لە شووشە عەتری پاریسیانەی گرانبەها بوو، دیزاینی توالێتەكە ئەبستراكتێكی سەرنج راكێش بوو، نامۆبوونەكەم ئەو كاتە دەستی پێكرد كە دەبینم قاڵبە زێڕێكی گەورەو قورس لە پاڵ سابوونە گچكەكاندا دانرابوو، لەسەر زێڕەكە نووسینێك هەڵكۆڵرابوو (( بۆ ئەو كەسەی بە باشترین شێوە خزمەت دەگەیەنێت بە مرۆڤایەتی . لە نەتەوە یەكگرتووەكانەوە پێشكەشە )) پاراستنی خەڵاتێكی جیهانی وا دانسقە لە توالێتدا جێی سەرسامبوونە..!!
ئەم دیمەنە رێكاو رێك لەوێدا وتەیەكی نووسەری پیرۆیی ((فارگاس یوسا))ی خستەوە یادم كە وتوویەتی ((هەموو دنیا باڕەشێكی پاشەڕۆ بارینە، تەنیا لە ژێر بنهەنگڵی هونەرا نەبێت، شتێكی تر نییە داڵدەی مرۆڤ بدات )) بێئەوەی لە هۆكاری دانانی ئەو قاڵبە زێڕەی ناو توالێت لە میلێن بپرسم بە خەندەیەكەوە لە بەرانبەر بەڕێزیان دانیشتمەوە و مۆڵەتم لێ خواست تەنیا نیو كاتژمێر وێنەی ڤیدیۆیی خۆیی و ماڵەكەی تۆماربكەم، بە ناو بیر و را و فكریدا رۆ نەچووم، تەنیا لە دیكۆر و ئەلبوم و وێنەكانیدا لە ناخی تێگەیشتم، ئینجا دواتر هەر خۆی چەند وێنەیەكی ساڵانی پەنجاكانی پێبەخشیم، بریتی بوون لە چەندین گرتەی سینەمایی كە بەكامێرای وێنەگری بەناوبانگ (هنری كۆست) وێنەگیرابوون، پێم خۆش بوو ئەم وێنە رەش و سپیانە وەك خۆی لە( گۆڤاری گوڵان ) بڵاوبێتەوە تا بە دیتنێكی خێرای فۆتۆكانەوە خوێنەران بیر لەو كوالێت و ستاتیكا سۆفت و بەرائەتە هونەرییە بكەنەوە كە ئەم ئەكتەرە هەیبووە و ئێستاش جێی شانازییە كە لای دەرهێنەرێكی كورد و لە فیلمێكدا رۆڵی پێ سپێردراوە و بە هەمان هەستی جوانی هونەرییانەی تافی لاوێتییەوە خەریكی نواندنە، كاتژمێر دەو سێزدە دەقیقەی هەمان شەو پشیلەكانی خاتوو میلێن كە هونەرسەلیم یەكێكیانی ناو لێنابوو (عەبەخڕە) بەرەو دەرگای دەرەوە پێشمان كەوتن و شەو شادیمان لە خاتوومیلێن كردو تا گەیشتمەوە بەر دەرگای هۆتێل لە سەرسامیمدا وامدەزانی هێشتا لە ماڵی میلێندا فكرو خەیاڵم بەجێماوە. .!!
