یانەی چێلسی ئینگلیزی پاڵەوانی خولی یانەكانی ئەوروپا بە فەرمی رایگەیاند بۆندێكی لەگەڵ یاریزانی هەڵبژاردەی بەلژیكا ئەدین هازارد مۆركردووە، بۆندەكەی یاریزانی یانەی لیلی فەرەنسی لەگەڵ یانەی چێلسی بۆ ماوەی چوار ساڵە و بەنرخی 32 ملیۆن پاوەندە، یاریزان هازارد بۆ ماوەی دوو ساڵ باشترین یاریزانی خولی فەرەنسا بووە و پێش ماوەیەك لە تویتەر رایگەیاندبوو كە پەیوەندی بە یانەی چێلسی دەكات سەڕەرای ئەوەی كە هەردوو یانەكەی شاری مانچستەر(یونایتد و سیتی) داوای ئەم یاریزانەیان كردبوو. یاریزان هازارد لە یاریگای ستامفۆرد بریدج درێسی یانەی چێلسی بەرزكردەوە و لە لێدوانێكیدا خۆشحاڵی خۆی دەڕبڕی بە پەیوەندیكردنی بە پاڵەوانی خولی چامپیۆنز لیگ و لەمباریەوە هازارد گوتی : من زۆر خۆشحاڵم بە گەیشتنم بۆ یانەی چێلسی، لە كۆتاییدا خەونە گەورەكەم هاتە دی، من زۆر بە پەرۆشەوە چاوەڕێی یاریكردنم لەگەڵ ئەم یانەیە گەورەیە. هازارد لە وەرزی 2010-2011 ئاستێكی بەرزی پێشكەشكرد و رۆڵێكی سەرەكی هەبوو لە بەدەستهێنانی نازناوی خولی فەرەنسا بۆ یانەی لیل، هەروەها لە وەرزی رابردوو ئاست بەرزی ئەم یاریزانە بەردەوام بوو و لەگەڵ یانەی لیل پلەی سێیەمی بە دەست هێنا و 20 گۆڵی تۆماركرد .
