سه‌رچاوه‌ رۆژنامه‌وانییه‌ ئیسپانییه‌كان گوتیان جۆزێ مۆرینۆی راهێنه‌ری یانه‌ی ریال مه‌دریدی ئیسپانی ده‌یه‌وێ گرێبه‌ست له‌گه‌ڵ فیلیپ لامی كاپتنی یانه‌ی بایرن میونشنی ئه‌ڵمانیدا بكات له‌ ماوه‌ی گواستنه‌وه‌ی هاوینه‌ی ئه‌مساڵ، ئه‌مه‌ش بۆ به‌هێزكردنی هێڵی به‌رگری یانه‌كه‌ی.
راپۆرته‌كان ئاماژه‌یان به‌وه‌داوه‌ كه‌ راهێنه‌ره‌ پورتوگالییه‌كه‌ به‌ توانا و ئاستی لام سه‌رسامه‌، به‌ تایبه‌ت كه‌ ئاستی ئه‌وی له‌ دوو یاری یانه‌ی بایرن میونخ به‌رامبه‌ر ریال مه‌درید له‌ قۆناخی پێش كۆتایی خولی یانه‌ پاڵه‌وانه‌كانی ئه‌وروپا بینیوه‌ كه‌ بووه‌ هۆی سه‌ركه‌وتنی یانه‌ ئه‌ڵمانییه‌كه‌ بۆ یاری كۆتایی.
رۆژنامه‌كان ده‌ڵێن مۆرینۆ وای داده‌نێت كه‌ لام ده‌توانێت كێشه‌كانی تیپه‌كه‌ی له‌ به‌رگری لای راستدا چاره‌سه‌ر بكات.
گرێبه‌ستی ئه‌و یاریزانه‌ له‌گه‌ڵ یانه‌ی بایرن میونشن تا ساڵی 2016 درێژ ده‌بێته‌وه‌ و به‌های هه‌ڵوه‌شاندنه‌وه‌ی ئه‌و گرێبه‌سته‌ 35 ملیۆن یۆرۆ و ئه‌وه‌ش پاره‌یه‌كی زۆره‌ بۆ ریال مه‌درید.