مانچسته‌ر یونایتد ده‌یه‌وێ بێرباتۆڤ بفرۆشێت
ئه‌و سه‌رچاوانه دووپاتی ده‌كه‌نه‌وه كه برباتۆڤ خۆی برِیاری رۆیشتنی داوه له هاوینی ئه‌مساڵدا و نایه‌وێ وه‌رزێكی تریش له‌سه‌ر كورسی یه‌ده‌گی یانه‌كه بمێنێته‌وه.
رۆژنامه‌ی مانچسته‌ر ئیڤنینگ نیوزی ئینگلیزی ئاشكرای كردووه كه برباتۆڤ له مانگی ئابی ئه‌مساڵدا ریزی یانه‌كه جێده‌هێڵێت دوای ئه‌وه‌ی هیچ ده‌سته‌به‌رێكی له‌لایه‌ن سێر ئه‌لێكس فێرگسۆنی راهێنه‌ری یانه‌كه‌وه به‌ده‌ست نه‌هێناوه بۆ یاریكردن به شێوه‌یه‌كی به‌رده‌وام له وه‌رزی داهاتوودا.
پێشتر یانه‌ی بایه‌ر لیڤه‌ركوزنی ئه‌ڵمانی كه له رابردوودا برباتۆڤ یاری بۆ كردووه، ویستی خۆی بۆ گێرِانه‌وه‌ی ئه‌و هێرشبه‌ره بولگارییه ئاشكرا كردبوو، به‌ڵام ئه‌و نرخه‌ی مان یو داوای ده‌كات بووه هۆی كشانه‌وه‌ی له ده‌سته‌واره‌كه.
به‌پێی رۆژنامه ئینگلیزییه‌كه مان یو ده‌یه‌وێ بربا به 15 ملیۆن یۆرۆ بفرۆشێت و تا ئێستا هیچ یانه‌یه‌ك ئه‌و برِه پاره‌یه‌ی بۆ كرِینی ئه‌و هێرشبه‌ره پێشكه‌ش نه‌كردووه.
