جارێكی دیكە ئەستێرەی ئەرژەنتینی سێرجیۆ ئەگوێرۆ هێرشبەری یانەی مانچستەر سیتی پابەندبوونی خۆی بەبۆندەكەی لەگەڵ یانەكەی دووپاتكردەوە و هەموو هەواڵێكی ڕەتكردەوە سەبارەت بەڕۆیشتنی بۆ یانەیەكی دیكە، ئەگوێرۆ لەیەكەم وەرزیدا لەگەڵ یانەی مانچستەر سیتی بەباشترین ئاست بەدیاركەوت و توانی 23 گۆڵ بۆ یانەكەی تۆمار بكات كە یەكێكیان گۆڵی بەدەستهێنانی خولی ئینگلتەرا بوو بەرامبەر یانەی كوینز پارك ڕینجەرز لەدوا ساتەكانی یارییەكەدا.
ناوی ئەگوێرۆ لەم دواییەدا بەیانەی ڕیال مەدریدەوە بەسترایەوە، بەڵام ئەگوێرۆ ئەم هەواڵانەی ڕەتكردەوە و مانەوەی لەگەڵ یانەی مانچستەر سیتی دووپاتكردەوە، لەلێدوانێكیدا بۆ ڕۆژنامەی تایمزی بەریتانی گوتی: داهاتووی من لەگەڵ مانچستەر سیتیە، من دەمەوێ لێرە بەردەوام بم، بۆندەكەم بۆ ماوەی چوار ساڵە، من لەم یانەیە خۆم دەدۆزمەوە.
دەربارەی هەواڵی گەڕانەوەی بۆ شاری مەدرید و یاریكردن بۆ یانەی شاهانە، ئەگوێرۆ گوتی: ڕۆژنامەكان بە بەردەوامی هەواڵ بڵاودەكەنەوە، بەڵام مەرج نییە هەمووی ڕاست بێت، من بیر لەڕۆیشتن بۆ یانەی ڕیال مەدرید و هیچ یانەیەكی دیكە ناكەمەوە.
لەكۆتایی لێدوانەكەی ئەگوێرۆ گوتی: من مامەڵەیەكی زۆر باشم لەگەڵ كراوە لەیەكەم ڕۆژی گەیشتنم بۆ شاری مانچستەر تا ئەمڕۆ، من و خێزانەكەم لێرە زۆر بەختەوەرین و دەمەوێ لەم یانە بەردەوام بم، تا ئێستا یەك نازناومان بردۆتەوە و هیوادارین نازناوی زیاتر بەدەست بهێنین.
************************