یانەی چێڵسی ئینگلیزی پاڵەوانی خولی یانەكانی ئەوروپا بەفەرمی ڕایگەیاند كە گۆڵچی هەڵبژاردەی كۆماری چیك (پیتەر چیك) بۆندەكەی لەگەڵ یانەی بلوز بۆ چوار ساڵی دیكە درێژكردەوە، پیتەر چیك لەساڵی 2004ـەوە لەیانەی چێڵسی یاری دەكات دوای ئەوەی لەیانەی ڕینی فەرەنسی هاتە ڕیزی یانەی بلوز بەبڕی 9 ملیۆن پاوەند و تا ئێستا 369 یاری لەگەڵ یانەكەی ئەنجامداوە و 3 جار خولی ئینگلتەرا و4 جار جامی ئینگلتەرا و دوو جار جامی كارلینگ و یەك جار خولی یانەكانی ئەوروپای بەدەست هێناوە.
راهێنەری پێشووی یانەی چێڵسی ڤیلاس بواس بڕیاری دابوو كە دەستبەرداری چیك بێت، بەڵام لەدوای هاتنی ڕاهێنەر دی ماتیۆ و ئەو ئاستە بەرزەی كە لەچامپیۆنزلیگ پێشكەشی كرد، دەستەی كارگێڕی یانەی چێڵسی ناچار بوو بۆندەكەی گۆڵچی پیتەر چیك بۆ چوار ساڵی دیكە درێژ بكاتەوە.
پیتەر چیك خۆشحاڵی خۆی دەڕبڕی بەم هەنگاوە و گوتی: من خۆشحاڵم كە بەشێكم لەپرۆژەی یانەیەكی گەورەی وەك یانەی چێڵسی لەچوار ساڵی داهاتوو و هیوادارم لەچوار ساڵی داهاتوو چەندین دەسكەوتی دیكە لەگەڵ یانەكەم بەدەست بهێنم.
******************