ئەستێرەی هەڵبژاردەی ئەرژەنتین و یانەی بەرشلۆنە لیۆنیل میسی هیوایەكی سەیری خواست بۆ ئەم هاوینە كە مەحاڵە بێتە دی ئەویش بەشداریكردنە لەیارییەكانی یۆرۆی 2012 لەهەردوو وڵاتی پۆڵەندا و ئۆكرانیا، میسی لە لێدوانێكیدا بۆ ئاژانسی دەنگوباسی فرانس پرێسی فەرەنسی گوتی: لەم هاوینە حەزم دەكرد بەشداری لەجامی نەتەوەكانی ئەوروپا بكەم هەرچەندە دەزانم ئەوە مەحاڵە، ئیرەیی بەو یاریزانانە دەبەم كە بەشداری لەیارییەكانی یۆرۆ دەكەن، چونكە ئەم پاڵەوانتەییە هیچی كەمتر نییە لەیارییەكانی مۆندیال، خۆزگەی ئەوەم دەخواست كە ئەم هاوینە یاریزانی هەڵبژاردەی ئیسپانیا بوومایە، بەڵام هەموو خۆزگەیەك نایەتە دی.
لەكۆتایی لێدوانەكەی میسی بەگاڵتەجاییەوە و بەپێكەنینەوە گوتی: هەوڵ دەدەم یەكێتی تۆپی پێی ئەوروپا ڕازی بكەم ڕێگا بەهەڵبژاردەی ئەرژەنتین بدات بەشداری لەیارییەكانی یۆرۆ بكات.
میسی كە هەردوو ڕەگەزنامەی ئیسپانی و ئەرژەنتینی هەیە چەندین دەسكەوتی كەسی لەوەرزی 2011 – 2012 تۆماركردووە، گۆڵكەری خولی ئیسپانیا بووە بەتۆماركردنی 50 گۆڵ، لاپچینی زێڕینی باشترین گۆڵكەری ئەوروپایە بەتۆماركردنی 100 خاڵ، گۆڵكەری چامپیۆنز لیگە بەتۆماركردنی 14 گۆڵ، لەیەك وەرزدا 73 گۆڵی تۆماركردووە كە ئەوانەش هەمووی ژمارەی پێوانەیین.