یەكێتی تۆپی پێی ئینگلتەرا ڕایگەیاند یاریزانی هێلی ناوەڕاستی یانەی مانچستەر سیتی گاریس باری بەهۆی پێكانەوە بەشداری لەگەڵ هەڵبژاردەی ئینگلتەرا ناكات لەیارییەكانی یۆرۆی 2012 كە لەهەردوو وڵاتی پۆڵەندا و ئۆكرانیا ئەنجام دەدرێت، باری لەیاریە دۆستانەكەی ئینگلتەرا و نەرویژ تووشی پێكان هات و لەدوای ئەنجامدانی پشكنینی پزیشكی دەركەوت كە تووشی داڕوشانی ماسوڵكە هاتووە، ڕۆی هۆدسۆن لەدوای ئەم پێكانە یاریزان باری دوورخستەوە و لەشوێنی ئەو یاریزانی یانەی ئیڤەرتۆن جاجێلكای بانگهێشت كرد بۆ ئەوەی بەشداربێت لەیارییەكانی یۆرۆدا.
رۆی هۆدسۆن ڕاهێنەری هەڵبژاردەی ئینگلتەرا دەربارەی پێكانی یاریزان گاریس باری لەلێدوانێكیدا بۆ ماڵپەڕی فەرمی یەكێتی تۆپی پێی ئینگلتەرا گوتی: هەست بەنائومێدی دەكەم بۆ ئەم پێكانە ناوەختەی یاریزان باری و بەشداری نەكردنی لەیارییەكانی یۆرۆدا، باری تەنیا یاریزانێك نییە لەپێكهاتەی 23 یاریزانی هەڵبژاردەی سێ شێرەكە، بەڵكو شوێنێكی سەرەكی هەبوو لەم پێكهاتەیە لەماوەی چەند ساڵی ڕابردوودا.
هەروەها هۆدسۆن گوتی: من دەزانم كە گاریس باری حەزی دەكرد بەشێك بێت لەهەڵبژاردەی ئینگلتەرا لەیارییەكانی یۆرۆدا، بەڵام بەداخەوە ئەو خەونەی نایەتە دی، ئێمە لەدوای یۆرۆ چاوەڕێی دەكەین و هیوای چاكبوونەوەی خێرای بۆ دەخوازم.
**********************