سەرچاوە رۆژنامەوانییە ئیسپانییەكان ئاشكرایان كردووە یانەی پاریس سانجێرمانی فەرەنسی دەستەوارەیەكی خەیاڵی بۆ كڕینی واین روونی هێرشبەری یانەی مانچستەر یونایتدی ئینگلیزی لە هاوینی ئەمساڵدا ئامادە كردووە.
سەرچاوەكان ئەو هەوڵەیان بە گەورەترین سوپرایزی ئەم هاوینە ناوبرد.
رۆژنامەی سپۆرتی ئیسپانی ئاشكرای كردووە كە یانە فەرەنسییەكە كە بە پارەی سەرمایەدارە عەرەبەكانی كەنداو دەژی، ئامادەیە بڕی 150 ملیۆن یۆرۆ وەك دەستەوارەیەك بدات بۆ كڕینی واین روونی كە ئەو پارەیە گرێبەست و مووچەی ئەو یاریزانە دەگرێتەوە.
رۆژنامەكە ئاشكرای كردووە شكستهێنانی هەوڵی پاریس سانجێرمان بۆ كڕینی لیۆنێل میسی و سەرنەكەوتنی لە بردنی ئەو یاریزانە بۆ ریزەكانی، وایكردووە یانەكە بە توندی بیر لە كڕینی ئەستێرەیەكی گەورە بكاتەوە لە هاوینی ئەمساڵدا و بۆ ئەوەش واین روونی 26 ساڵی كردووەتە ئامانجی خۆی.
یانەی پاریس سانجێرمانی فەرەنسی دەیەوێ هاوشێوەی مانچستەر ستی ئینگلیزی هەنگاو بنێت كە بە ئەنجامدانی چەندین گرێبەستی گەورە توانی دوای 46 ساڵ دابڕان، نازناوی خولی ئینگلیزی بباتەوە.