رۆژنامەی دەیلی تەلەگرافی بەریتانی گوتی یانەی چێڵسی ئینگلیزی بڕی 40 ملیۆن پاوەند دەداتە یانەی لیلی فەرەنسی لە پێناو گواستنەوەی ئیدین هازاردی یاریزانی ئەو یانەیە كە دوێنێ ئاشكرای كرد پەیوەندی بە یانەی چێڵسییەوە دەكات لە هاوینی ئەمساڵدا.
رۆژنامەكە دەڵێ جیا لەو بڕە پارەیە كە مافی كڕینی هازاردە، یانەی چێڵسی مووچەی ئەو یاریزانە تەمەنی 21 ساڵەی بە 10 ملیۆن پاوەندی ساڵانە داناوە.
ئەمە جیا لەوەی كە یانەی چێڵسی پاڵەوانی ئەوروپا دەبێ 6 ملیۆن پاوەند بداتە جۆن بیكۆی بەڕێوەبەری كارەكانی هازارد كە رۆڵی گەورەی هەبووە لە سەرخستنی دانووستانی نێوان هەردوولا بۆ گواستنەوەی ئەو یاریزانە بۆ یانەكە.
دەیلی تەلەگراف دەڵێ ئەگەر گرێبەستەكە وەك ئەوەی باسدەكرێ سەربگرێت، ئەوا ئەو یاریزانە بەپێی رێكەوتنی نێوان هەردوولا گرێبەستێك بۆ ماوەی 5 ساڵ ئیمزا دەكات و ئەوەش مانای ئەوەیە تێچووی گشتیی گواستنەوەكە لەسەر چێڵسی دەگاتە 78 ملیۆن پاوەند كە دەكاتە نزیكەی 90 ملیۆن یۆرۆ و رۆژنامەكە پێی وایە ئەوە بۆ یانەیەكی وەك چێڵسیش كە لە كاتی كڕینی یاریزاناندا بیر لە پارە ناكاتەوە، بڕێكی زۆرە.