یانەی برووسیا دۆرتمۆند دەستەوارەیەكی یانەی مانچستەر یونایتدی بۆ گرێبەستكردن لەگەڵ شینجی كاگاوای یاریزانی یانەكە رەتكردەوە.
رۆژنامەی گاردیانی بەریتانی ئاشكرای كرد یانەی دۆرتمۆندی پاڵەوانی خول و جامی ئەڵمانیا گرێبەستی مانچستەر یونایتدی بۆ كڕینی كاگاوا رەتكردووەتەوە كە بڕەكەی گەیشتووەتە 12.8 ملیۆن پاوەند لە كاتێكدا یانە ئەڵمانییەكە دوو وەرز لەمەوبەر ئەو یاریزانەی بە بری 350 هەزار یۆرۆ لە یانەی سیریزۆ ئۆزاكا كڕی.
هەرچەندە یانەی دۆرتمۆند داوای بڕە پارەیەكی زۆر دەكات بۆ دەسهەڵگرتن لەو یاریزانە لێهاتووە، بەڵام رۆژنامەكە پێی وایە كە لە چەند هەفتەی داهاتوودا گواستنەوەی ئەو یاریزانە بە بڕی 17 تا 18 ملیۆن یۆرۆ كۆتایی دێت.
پێشتر سێر ئەلێكس فێرگسۆنی راهێنەری یانەی مانچستەر یونایتد لە یاری كۆتایی جامی ئەڵمانیادا چاوی بە كاگاوا كەوت و داوای چوونە ریزی یانەكەی لێكرد.