یانه‌ی چێڵسی ئینگلیزی دوای چاوه‌رِوانییه‌كی زۆر و چه‌ندین ساڵ هه‌وڵی به‌رده‌وام، توانی نازناوی خولی یانه‌ پاڵه‌وانه‌كانی ئه‌وروپا بۆ یه‌كه‌مجار له‌ مێژووی خۆیدا به‌ده‌ست بێنێت دوای ئه‌وه‌ی دوێنێ شه‌و له‌ یاری كۆتاییدا له‌ یانه‌ی بایرن میونشنی ئه‌ڵمانی برده‌وه‌ به‌ لێدانی سزای یه‌كلاكه‌ره‌وه‌.
هه‌رچه‌نده‌ له‌ یارییه‌كه‌دا یانه‌ی بایرن میونشن به‌هۆی یاریكردن له‌سه‌ر یاریگای خۆیه‌وه‌ باشتر ده‌ركه‌وت و توانی زۆرینه‌ی كاتی یارییه‌كه‌ باڵاده‌ست بێت، به‌ڵام ئه‌و یانه‌یه‌ نه‌یتوانی پارێزگاری له‌و گۆڵه‌ بكات كه‌ تۆماس مۆله‌ر له‌ خوله‌كی 83ی یارییه‌كه‌دا تۆماریكرد و دوای ته‌نیا 5 خوله‌ك دیدێ درۆگبا ئه‌نجامه‌كه‌ی یه‌كسان كرده‌وه‌ و له‌ لێدانه‌كانی سزادا یانه‌ی چێڵسی 4-3 سه‌ركه‌وتنی به‌ده‌ست هێنا.
یانه‌ی بلووز بووه‌ بیسته‌مین یانه‌ له‌ مێژوودا نازناوی ئه‌و پاڵه‌وانیه‌تییه‌ به‌ده‌ست بێنێت و پێشتر ریال مه‌درید 9 نازناو، میلان 7 نازناو، لیڤه‌رپوول 5 نازناو، به‌رشه‌لۆنه‌ و بایرن میونشن و ئه‌یاكس هه‌ریه‌كه‌یان 4 نازناو، ئینته‌رمیلان و مانچسته‌ر یونایتد 3 نازناو، پۆرتۆ و یۆڤنتۆس و نۆتینگهام فۆرێست و به‌نفیكا هه‌ریه‌كه‌یان دوو جار نازناوه‌كه‌یان به‌ده‌ست هێناوه‌ و یانه‌كانی برووسیا دۆرتمۆند، مارسیلیا، بلو ستار، ئایندهۆڤن، ستیوا بوخارێست، هامبۆرگ، ئه‌ستۆن ڤێلا، فینۆرد رۆتردام و سه‌لتیك سه‌رو یه‌ك جار ئه‌و نازناوه‌یان بردووه‌ته‌وه‌.