لۆران بلان ڕاهێنەری هەڵبژاردەی فەرەنسا ڕایگەیاند لەوانەیە لەدوای تەواوبوونی یارییەكانی یۆرۆی 2012 ئەركی ڕاهێنانی یانەیەكی ئەوروپی وەربگرێت، بلان داوای تازەكردنەوەی بۆندەكەی كردبوو لەگەڵ هەڵبژاردەی فەرەنسا، بەڵام یەكێتی تۆپی پێی فەرەنسا ئەم داوایەی بەئەنجامەكانی كەڵەشێرەكان لەیۆرۆ بەستەوە.
بلان لەلێدوانێكیدا بۆ كەناڵی (TF1) ی فەرەنسی گوتی: لەوانەیە بۆندێك لەگەڵ یانەیەكی ئەوروپی گەورە مۆر بكەم ئەگەر بۆندەكە شایستە بێت، بەڵام ئەركە سەركییەكەی خۆم لەبیر ناكەم لەگەڵ هەڵبژاردەی فەرەنسا لەیارییەكانی یۆرۆی 2012 0
هەروەها بلان گوتی: من هەردەم ڕاشكاو بووم، ئارەزووم هەبوو لەئەركی ڕاهێنانی هەڵبژاردەی فەرەنسا بەردەوام بم بەبێ ئاوەڕدانەوە لەئەنجامەكانی یۆرۆی 2012، بەڵام كاروبارەكان بەم شێوەیە نەبوون، ئەوە گرنگ نییە و نابێ كاریگەری لەسەر بارودۆخی خۆئامادەكردنی هەڵبژاردەكەمان بۆ یارییەكانی یۆرۆ هەبێت.
شایانی باسە چەندین یانەی گەورەی ئەوروپا ناوییان بەڕاهێنەر بلان بەستراوە بۆ ئەوەی ببێتە ڕاهێنەریان وەك یانەكانی ئینتەرمیلانی ئیتالی و چێلسی ئینگلیزی.