ئەستێرەی یانەی ڕیال مەدریدی ئیسپانی مەسعود ئۆزێل هیوای ئەوەی خواست یانەی بایرەن میونیخی ئەڵمانی لەیانەی چێڵسی ئینگلیزی بباتەوە لەیاری كۆتایی خولی یانە پاڵەوانەكانی ئەوروپا كە ڕۆژی شەممەی داهاتوو لەیاریگای ئەلیانز ئەرینا لەشاری میونیخ بەڕێوەدەچێت.
ئۆزێل كە لەگەڵ یانەی ڕیال ئاهەنگی گێڕا بەبۆنەی بەدەستهێنانی نازناوی لیگای 32 هیوای ئەوەی خواست یانە گەورەكەی هەرێمی باڤاریا جامی چامپیۆنز لیگ بەرز بكاتەوە و لەلێدوانێكیدا گوتی: لەیاری كۆتایی خولی یانە پاڵەوانەكان من هاندەری بایرەن میونیخم. هەروەها ئۆزێل وتی: سەڕەرای ئەوەی بردنەوەی نازناوی لیگا تا ڕادەیەك شكستەكەی دەرچوونمان لەخولی یانەكانی ئەوروپا لەبیر بردەوە، بەڵام لەگەڵ نزیكبوونەوەی یاری كۆتایی چامپیۆنز لیگ زامەكان دووبارە دەبنەوە كە نەمانتوانی لایەنێكی یاری كۆتایی بین، بەڵێن دەدەین لەوەرزی داهاتوو بەهەموو توانامان هەوڵ دەدەین كە نازناوەكە بەدەست بهێنین.
شایانی باسە دوا نازناوی یانەی ڕیال مەدرید لەخولی یانە پاڵەوانەكانی ئەوروپا لەساڵی 2002 بوو كاتێك لەیاری كۆتایی بەئەنجامی (2-1) گۆڵ لەیانەی بایەرلیڤەركوزنی ئەڵمانی بردەوە.