جۆزێ مۆرینۆی راهێنه‌ری یانه‌ی ریال مه‌دریدی ئیسپانی حه‌وته‌مین نازناوی خوله‌ ناوخۆییه‌كانی له‌ چوار وڵاتی جیاوازدا به‌ده‌ست هێنا كه‌ ئه‌مه‌ ژماره‌یه‌كی پێوانه‌ییه‌، به‌ڵام ئه‌و راهێنه‌ره‌ ئاشكرای كرد بردنه‌وه‌ی خولی ئیسپانی قورسترین نازناو بووه‌.
ریال مه‌درید دوێنێ شه‌و دوای بردنه‌وه‌ی له‌ یانه‌ی ئه‌تله‌تیك بلباو 3-0 توانی دوو هه‌فته‌ به‌ر له‌ كۆتایی هاتنی وه‌رزی ئه‌مساڵ نازناوی خولی ئیسپانی به‌ده‌ست بێنێت كه‌ ئه‌وه‌ نازناوی ژماره‌ 32ی ریال مه‌درید له‌ خولی ئیسپانیدا.
مۆرینۆ دوای بردنه‌وه‌ی نازناوه‌كه‌ گوتی شایسته‌ی به‌ده‌ستهێنانی نازناوه‌كه‌ بووین، چونكه‌ خاڵی زۆرمان به‌ده‌ست هێنا و كه‌س له‌ ئێمه‌ باشتر نه‌بوو.
راهێنه‌ره‌ پورتوگالییه‌كه‌ پیرۆزبایی له‌ هه‌موو ئه‌و كه‌سانه‌ كرد كه‌ به‌ بردنه‌وه‌ی ئه‌و نازناوه‌وه‌ ماندوبوون، به‌تایبه‌ت ماڵباتی یاریزانانی یانه‌كه‌ی و دووپاتی كرده‌وه‌ كه‌ نازناوی خولی ئیسپانی قورسترین نازناوه‌ كه‌ له‌ ژیانیدا به‌ده‌ستی هێناوه‌.
پێشتر مۆرینۆ نازناوی خولی پورتوگالی له‌گه‌ڵ پۆرتۆ و ئینگلیزی له‌گه‌ڵ چێڵسی و ئیتاڵی له‌گه‌ڵ ئینته‌رمیلاندا به‌ده‌ست هێناوه‌.