خۆسێ رامۆن ساندۆڤاڵی به‌رِێوه‌به‌ری هونه‌ری له‌ یانه‌ی رایۆ ڤالیكانۆی ئیسپانی دڵته‌نگی خۆی به‌ سه‌مای دانی ئه‌لڤێش و تیاگۆ ئه‌لكانتارا ده‌ربرِی له‌ دوای ئه‌وه‌ی ئه‌لكانتارا گۆڵی پێنجه‌می یانه‌كه‌ی تۆمار كرد له‌و یارییه‌دا كه‌ هه‌ردوو یانه‌ی له‌ شه‌وی یه‌كشه‌مه‌ی رابروودا كۆكرده‌وه‌ و به‌ بردنه‌وه‌ی به‌رشه‌لۆنه‌ 7-0 كۆتایی هات.
ساندۆڤال گوتی ئه‌و یاریزانانه‌ بۆ له‌و كاته‌ی تۆرێس له‌ یاریگای خۆیاندا گۆڵی لێكردن هه‌مان سه‌مایان نه‌ده‌كرد، له‌وێ باشتر ده‌یانتوانی سه‌ما بكه‌ن، ئه‌وه‌ بێرِێزیییه‌ تۆ له‌ یاریگای به‌رامبه‌ردا سه‌ما بكه‌یت و دواییش ئه‌گه‌ر شتێك رووی دا ده‌ڵێن ئه‌وه‌ هه‌ڵه‌ی جه‌ماوه‌ره‌ و هه‌ڵه‌ی یاریزانان نییه‌.
دوای یارییه‌كه‌ و دوای ئه‌وه‌ی ره‌خنه‌یه‌كی زۆر له‌ هه‌ڵسوكه‌وتی ئه‌و دوو یاریزانه‌ی به‌رشه‌لۆنه‌ گیرا، ئه‌لڤێش و ئه‌لكانتارا داوای لێبوردنیان له‌ جه‌ماوه‌ری یانه‌ی رایۆ ڤالیكانۆ كرد.