سه‌رچاوه‌ رۆژنامه‌وانییه‌كانی ئیسپانیا ئاشكرای كرد كه‌ جۆزێ مۆرینۆی راهێنه‌ری یانه‌ی ریال مه‌دریدی ئیسپانی پلانی هه‌یه‌ بۆ ئه‌وه‌ی له‌ ماوه‌ی گواستنه‌وه‌ی هاوینه‌دا 6 یاریزان بفرۆشێت و 7 یاریزانی تر بكرِێت له‌ پێناو به‌هێزكردنی پێكهاته‌ی تیپه‌كه‌یدا.
به‌پێی ئه‌و سه‌رچاوانه‌ ئامانجی یه‌كه‌می مۆرینۆ كرِینی كۆرتۆرای گۆڵپارێزی یانه‌ی ئه‌تله‌تیكۆ مه‌درید ده‌بێت بۆ جێگرتنه‌وه‌ی ئیكه‌ر كاسیاس.
هه‌روه‌ها ئه‌و راهێنه‌ره‌ پورتوگالییه‌ هه‌وڵی هێنانی چه‌ند به‌رگریكه‌رێك ده‌دات و له‌ به‌رامبه‌ردا ریكاردۆ كارفالیۆ و رائول ئه‌لبیۆل ده‌فرۆشێت، ئه‌مه‌ جیا له‌ هێنانی یاریزانێكی لێهاتوو بۆ شوێنی ئه‌نخیل دی ماریا له‌ كاتێكدا ئه‌گه‌ر ئه‌و یاریزانه‌ دووچاری پێكان هات و دیارترین یاریزانی ئه‌و جێگایه‌ش خافی مارتینێزی یاریزانی یانه‌ی ئه‌تله‌تیك بلباو ده‌بێت.
هه‌رچه‌نده‌ رۆژنامه‌كان ناوی ته‌واوی ئه‌و یاریزانانه‌یان ئاشكرا نه‌كردووه‌ كه‌ له‌ هاویندا ریزی یانه‌كه‌ جێده‌هێڵن، به‌ڵام پێده‌چێ سێرجیۆ ئه‌گوێرۆ شوێنگره‌وه‌ی گۆنزالۆ هیگواین بێت و ئه‌و یاریزانانه‌ی تریش كه‌ ده‌رِۆن بریتی بن له‌ لاسانا دیارا، ریكاردۆ كارفالیۆ، رائول ئه‌لبیۆل و ریكاردۆ كاكای ئه‌ستێره‌ی به‌رازیلی.