رۆژنامەی ماركای ئیسپانی گوتی یانەی ریال مەدریدی پێشەنگی خولی ئیسپانی گەنجترین یانەیە لە رووی تەمەنی یاریزانەكانییەوە كە پێشەنگی خولێكی ئەوروپای گرتووە.
بەپێی رۆژنامەكە یاریزانانی ریال مەدرید كەمترین تەمەنیان هەیە لە نێو ئەو یانانەدا كە لە دوای كۆتایی هاتنی نیوەی وەرزی ئەمساڵ پێشەنگی خولەكانی خۆیان گرتووە و بوونەتە پاڵەوانی زستانە.
رۆژنامەكە سەرژمێری تەمەنی یاریزانەكانی ریال مەدریدی كردووە و دەڵێ رێژەی تەمەنیان 24.7 ساڵە و دوای ئەوان رێژەی تەمەنی یاریزانانی مانچستەر ستی دێت كە 24.8 ساڵە و دوای ئەویش یانەی پاریس سانجێرمانی فەرەنسی كە هاوینی رابردوو ژمارەیەك یاریزانی نوێی بردە ریزەكانییەوە رێژەی تەمەنی یاریزانەكانی 25.1 ساڵە.
ماركا دەڵێ بایرن میونشنی پێشەنگی خولی ئەڵمانی رێژەی تەمەنی یاریزانەكانی 25.6 ساڵە و دوای ئەویش یانەی ئەی سی میلانی ئیتاڵی پێشەنگی خولی ئیتاڵی دێت كە رێژەی تەمەنی 28 ساڵە.