یەكێتی پایسكلسواری كوردستان بەفەرمی بڕیاری دا لە 22ی ئەم مانگە قۆناغی سێیەم و كۆتایی پاڵەوانێتی كوردستان بۆ پایسكلسواری لەسەر ئاستی كوڕان بۆ پێشكەوتووان و لاوان و تازەپێگەیشتووان و كچان لە شاری سلێمانی بەڕێوە بچێت و پاڵەوانێتییەكە ماوەی دوو رۆژ دەخایەنێت، ئەم پێشبڕكێیە لەسەر ئاستی پێشكەوتووان بۆ ماوەی (60)كم بۆ تاكی گشتی و لەسەر ئاستی لاوان بۆ ماوەی (50)كم بۆ تاكی گشتی و لەسەر ئاستی تازەپێگەیشتووان بۆ (35)كم بۆ تاكی گشتی و لەسەر ئاستی كچان بۆ ماوەی (20)كم بۆ تاكی گشتی ئەنجام دەدرێت.
لە لێدوانێكی تایبەتدا عەبدولقادر نورەددین راهێنەری تیپی پایسكلسواری یانەی هەولێر گوتی: ئێمە بە باشی خۆمان بۆ ئەم پاڵەوانێتییە ئامادە كردووە و هەوڵ دەدەین لە گشت ئاستەكان بە تایبەتی لەسەر ئاستی پێشكەوتووان پلەی یەكەم بە دەستبهێنین، هەرچەندە یاریزانێكمان لە ریزی هەڵبژاردەی عێراق لە پاڵەوانێتی وڵاتانی عەرەبی یاری دەكات، بەڵام ئەمە نابێتە رێگر بۆ بە دەستهێنانی ئەنجامێكی باش.
جێگەی باسە قۆناغی یەكەم و دووەمی ئەم پاڵەوانێتییە لە هەردوو شاری هەولێر و دهۆك بەڕێوەچوو و چەندین یانەی كوردستان بەشدارییان تیاییدا كردبوو.