واین روونی هێرشبەری یانەی مانچستەر یونایتدی ئینگلیزی گوتی نازناوی وەرزی ئەمساڵی خولی نایابی ئینگلیزی لە شاری مانچستەر ناچێتە دەرەوە.
روونی كە تیپەكەی بە 39 خاڵ پلەی دووەمی ریزبەندی خولی پریمەرلیگی گرتووە لە دوای مانچستەر ستییەوە گوتی دوو یانە زەبەلاحەكەی شاری مانچستەر نزیكترین یانەن بۆ بردنەوەی نازناوی وەرزی ئەمساڵ و ئێمە دەتوانین لە كۆتایی وەرزی ئەمساڵدا پارێزگاری لە نازناوەكەی وەرزی رابردوومان بكەین.
ئەو هێرشبەرە لە لێدوانی بۆ رۆژنامەی دەیلی ستاری ئینگلیزی گوتی تارادەیەكی زۆر پاڵەوانیەتییەكە لە نێوان ئێمە و مانچستەر ستیدایە، هەرچەندە من پێم وایە لە كۆتاییدا ئێمە پێشەنگ وەردەگرینەوە و نازناوەكە دەبەینەوە.
مانچستەر یونایتد لە وەرزی ئەمساڵدا دووچاری ژمارەیەكی كەوتنی گەورە هات، لەوانەش دۆڕانی بەرامبەر مانچستەر ستی 6-1 و چوونە دەرەوەی لە خولی یانە پاڵەوانەكانی ئەوروپا لەسەردەستی یانەی بازڵی سویسری.