مارسیلینۆ گارسیا تۆرالی راهێنەری یانەی سڤیلیەی ئیسپانی دۆڕانی تیپەكەی بە یانەی ریال مەدرید 6-2 بە گورزێكی كوشندە ناوبرد.
مارسیلینۆ لە دوای یاری هەردوو یانە لە كۆنگرەیەكی رۆژنامەنووسیدا گوتی دوای ئەو دۆڕانە هەست دەكەم تیپەكەمان نوقم بووە، چونكە لە یارییەكەدا ئاستی جێگیر نەبوو، لەبەرئەوە دەبێ هەڵەكانمان چاك بكەینەوە.
مارسیلینۆ گوتی ناتوانم هۆكاری ئەو شكستە شی بكەمەوە، لە یارییەكەدا ریال زۆر سەركەوتوو بوو بەسەرماندا و ئێمەش هەڵەی كوشندەمان كرد و كاتێك ئەنجامەكە 2-0 بوو دەمانتوانی شت بكەین، بەڵام گۆڵی سێیەم هەموو دۆخەكەی گۆڕی.
راهێنەرەكەی سڤیلیە رەتی كردەوە ئەم دۆڕانە ئەوەی سەلماندبێ كە تیپەكەی لە ماوەی گواستنەوەی زستانەدا پێویستی بە هێنانی یاریزانی نوێ هەیە و گوتی ئەوەی هەیە تەنیا ئەوەندەیە كە دەبێ خۆمان رێك بخەینەوە و زوو لە كاریگەرییەكانی ئەو دۆڕانە دەربچین.