رۆژنامەی فرانس فوتبۆڵی فەرەنسی ئاشكرای كرد یانەی پاریس سانجێرمان و دیڤید بێكهامی ئەستێرەی ئینگلیزی رێكەوتوون لەسەر گواستنەوەی بێكهام بۆ ریزی یانەكە لە ماوەی زستانەی گواستنەوەی یاریزاناندا.
بێكهام كە ئەمساڵ نازناوی خولی تۆپی پێی ئەمەریكی لەگەڵ یانەی لۆس ئەنجلۆس گالاكسیدا بەدەست هێنا، گرێبەستەكەی لەگەڵ ئەو یانەیە كۆتایی هات و تا ئێستا گرێبەستەكەی نوێ نەكردووەتەوە و ئەوەش گومانی زۆری لەسەر گەڕانەوەی ئەو یاریزانە بۆ ئەمەریكا دروست كردووە.
پێشتر چەند بەرپرسێكی یانەی پاریس سانجێرمان كە موڵكی دەوڵەمەندەكانی قەتەرە ئاشكرایان كردبوو هەوڵی كڕینی بێكهام دەدەن.
فرانس فوتبۆڵ دەڵێ بێكهام رێكەوتووە لەگەڵ یانە پاریسییەكەدا بۆ ئەوەی لە یەنایەری داهاتووەوە بۆ ماوەی 18 مانگ یاری بۆ یانەكە بكات.