سەرچاوە رۆژنامەوانییەكانی ئیسپانیا دەڵێن یانەی ڤالنسیا سەرنجی ژمارەیەك وەبەرهێنی لە جیهاندا بەلای خۆیدا راكێشاوە و دامەزراوەیەكی دارایی ئینگلیزی زۆر نزیكە لەوەی یانەكە بكڕێتەوە و سەرمایەكەی بۆ 500 ملیۆن یۆرۆ بەرز بكاتەوە و بیكاتە دەوڵەمەندترین یانەی ئیسپانیا.
چاودێران پێیان وایە ئاستی یاریزانانی یانەی ڤالنسیا لەسەر یاریگە و جەنگانی بەردەوامیان بەرامبەر یانەكان بە تایبەت بەرشەلۆنە و ریال مەدرید لە وەرزی ئەمساڵدا وایكردووە سەرنجی وەبەرهێنان بەلای خۆیاندا رابكێشن، چونكە وەك سەرچاوەكان روونی دەكەنەوە وێڕای سەرمایەدارە ئینگلیزەكان چەند سەرمایەدارێكی عەرەبیش چاویان لە یانەكە بڕیوە بۆ ئەوەی بیكڕن، بەڵام ئینگلیزەكان لەو كارەوە نزیكترن.
یانەی ڤالنسیا لە وەرزی ئەمساڵدا تا ئێستا پلەی سێیەمی خولی ئیسپانی گرتووە و لە خولی یانە پاڵەوانەكانی ئەوروپاش دوای كردنە دەرەوەی، ئێستا لە خولی یۆرۆلیگ یاری دەكات.
ڤالنسیا لە چەند ساڵی رابردوودا كێشەی گەورەی دارایی هەبوو، بەڵام هەفتەی رابردوو بەهۆی فرۆشتنی زەوی یاریگای كۆنی یانەكەوە كێشە داراییەكانی یانەكە بە شێوەیەكی بەرچاو كەم بوونەوە.