رۆژنامەی دەیلی ستاری بەریتانی ئاشكرای كرد یانەی تۆتنهام هۆتسپێری ئینگلیزی بڕی 20 ملیۆن پاوەندی بۆ رازیكردنی یانەی مانچستەر ستی داناوە لە پێناو دەستبەرداربوون لە كارلۆس تێڤێزی هێرشبەری ئەرجەنتینی.
بەپێی ئەو رۆژنامەیە ئەو بڕە پارەیە زۆر زۆرە بۆ توانا داراییەكانی یانەی تۆتنهام، بەڵام ویستی یانەكە بۆ گەڕانەوە بۆ خولی یانە پاڵەوانەكانی ئەوروپا لە وەرزی داهاتوودا و ویستی بۆ بردنەوەی نازناوی خولی ئینگلیزی كارگێڕیی یانەی تۆتنهامی ناچار كردووە ئامادەبن ئەو پارە زۆرە بە تێڤێز بدەن.
لە وەرزی ئەمساڵدا تۆتنهام توانی ئیمانوێل ئەدیبایۆری هێرشبەری تۆگۆلی بە خواستن لە یانەی مانچستەر ستی وەربگرێت.
رۆژنامەكە دەڵێ كارگێڕیی تۆتنهام تەنیا ئامادە نییە 20 ملیۆن پاوەند بدات، بەڵكە ئامادەیە بڕی ئەو پارەیە زیاد بكات ئەگەر دڵنیابێت لەوەی تێڤێز پەیوەندی بەو یانەیەوە دەكات، بە تایبەت كە ئێستا یانەكانی میلان و پاریس سانجێرمان دەیانەوێ تێڤێز بكڕن.