لە بارەگای گۆڤاری فرانس فوتبۆل لە شاری پاریسی پایتەختی فەرەنسا، یەكێتی تۆپی پێی جیهانی فیفا بە هاوبەشی لە گەڵ لێپرسراوانی گۆڤارەكە ناوی دوا سێ یاریزانیان ئاشكرا كرد بۆ خەڵاتی تۆپی زێڕین و ناوی دوا سێ كچە یاریزان بۆ خەڵاتی باشترین كچە یاریزان و ناوی دوا سێ راهێنەر بۆ خەڵاتی باشترین راهێنەر، هەروەها دوا سێ گۆڵ دەست نیشان كران بۆ خەڵاتی جوانترین گۆڵ ( خەڵاتی بۆشكاش ).
بۆ خەڵاتی باشترین یاریزانی جیهان و تۆپی زێڕین هەرسێ یاریزان بە پێی لیستی فیفا بریتی بوون لە یاریزانی هەڵبژاردەی پورتوگال و یانەی ریال مەدریدی ئیسپانی كریستیانۆ رۆنالدۆ و یاریزانی هەڵبژاردەی ئەرژەنتین و یانەی بەرشلۆنەی ئیسپانی لیۆنیل میسی، هەروەها یاریزانی هەڵبژاردەی ئیسپانیا و یانەی بەرشلۆنەی ئیسپانی زاڤی هێرناندیز، هەرسێ یاریزانەكەش لە خولی ئیسپانیا یاری دەكەن.
سەبارەت بە خەڵاتی باشترین كچە یاریزانیش لیستەكەی فیفا بریتی بوو لە كچە یاریزانی بەرازیلی مارتا و كچە یاریزانی ژاپۆنی هوماری ساوا و كچە یاریزانی ئەمریكی ئابی وامباك.
بۆ خەڵاتی باشترین راهێنەری جیهان لە ساڵی 2011 لیستەكەی فیفا پێكهاتووە لە سێر ئەلێكس فێرگسۆن راهێنەری یانەی مانچستەر یونایتدی ئینگلیزی و پیب گواردیۆلا راهێنەری یانەی بەرشلۆنەی ئیسپانی و جۆزێ مۆرینهۆ راهێنەری یانەی ریال مەدریدی ئیسپانی.
بۆ خەڵاتی جوانترین گۆڵی لە ساڵی 2011 سێ گۆڵ دەست نیشان كراون كە بریتین لە گۆڵی یاریزان لیونیل میسی كە بۆ یانەی بەرشلۆنە تۆماری كرد بەرامبەر یانەی ئەرسنالی ئینگلیزی لە خولی یانەكانی ئەوروپا، هەروەها گۆڵی یاریزان نیمار دا سیلڤا كە بۆ یانەی سانتۆس تۆماری كرد لە بەرامبەر یانەی فلامینگۆ لە خولی یانەكانی بەرازیل، دوا گۆڵیش گۆڵی یاریزان وێین رونی كە بۆ یانەی مانچستەر یونایتد تۆماری كرد لە بەرامبەر یانەی مانچستەر سیتی لە خولی نایابی ئینگلتەرا.
شایانی باسە ئاهەنگی كۆتایی خەڵاتەكان لە رۆژی 9/1/2012 لە هۆڵی كۆنگریس هاوس لە شاری زیوریخ بەڕێوە دەچێت، لەگەڵ ئەم خەڵاتانەش خەڵاتەكانی باشترین راهێنەری تیپی ئافرەتان و خەڵاتی سەرۆكایەتی فیفا و خەڵاتی یاری پاك دابەش دەكرێت لە گەڵ راگەیاندنی تیپی نموونەیی ساڵی 2011 .