ئەمشەو لە سەعات 12 بە كاتی هەرێمی كوردستاندا، یاری كلاسیكۆی یەكەمی وەرزی ئەمساڵی خولی ئیسپانی لە نێوان هەردوو یانەی ریال مەدرید و بەرشەلۆنە لەسەر یاریگای سانتیاگۆ برنابیۆ بەڕێوەدەچێت.
بەر لە یارییەكەی ئەمشەو یانەی ریال مەدرید كە 14 یاری ئەنجامداونە بە جیاوازی 3 خاڵ لە بەرشەلۆنە پێشەنگی خولی ئیسپانیای گرتووە لە كاتێكدا بەرشەلۆنە بەهۆی بەشداریكردنی لە مۆندیالی یانەكان یارییەكی زیاتری ئەنجامداوە.
هەرچەندە ئەو دوو زەبەلاحەی ئیسپانیا لە كاتی رووبەڕووبوونەوەی یەكتردا هەموو خاڵێكی وەك جیاوازی و پێشەنگ لە بیر دەكەن، بەڵام دۆخی ئەم كلاسیكۆیە زۆر جیاوازە لە كلاسیكۆكانی چەند ساڵی رابردوو و هەر ئەوەش وایكردووە پێشبینی چێژ و ئاستێكی جیاواز لە هەردوو یانە بكرێت.
ئەگەر ریال مەدرید یارییەكە بباتەوە هەنگاوێكی زۆر بەرەو نازناوی خولی ئەمساڵی لالیگا دەبات و یاریزانانی بەرشەلۆنە تووشی بێئومێدی دەبن كاتێك دەبینن یارییەكیان زیاتر لە ریال مەدرید ئەنجامداوە و 6 خاڵ لە دواوەین، هەر لەبەرئەوەشە بەرشەلۆنە هەوڵی زۆری بردنەوەی یارییەكە دەدات و نزیكە لەوەی ئەمە بەدەست بێنێت، چونكە گوادیۆلا و یاریزانەكانی لە چەند ساڵی رابردوودا لە هیچ شتێك بێئومێد نەبوون و خۆیان بەدەستەوە نەداوە.
خۆ گەر بەرشەلۆنە یارییەكە بباتەوە ئەوە جارێكی تر دووپات دەبێتەوە هێشتا ریال مەدرید ماویەتی بگاتە ئاستی بەرشەلۆنە و ئەمەش یاریزانانی ریال مەدرید دووچاری بێئومێدی دەبن و دوور نییە چەند یارییەكی لەسەر یەك لە خولی ئیسپانیدا بدۆڕێنن تا هاوسەنگیی وەردەگرنەوە و بەخۆیاندا دەچنەوە.