راپۆرتە رۆژنامەوانییەكانی ئیتاڵیا ئاشكرایان كرد كە ریكاردۆ كاكای پلەی مەیكەری بەرازیلی جارێكی تر دەگەڕێتەوە بۆ یانەی میلان لە ماوەی گواستنەوەی زستانەی یاریزاناندا.
رۆژنامەی كۆریری سپۆرتی ئیتاڵی گوتی كاكای یاریزانی یانەی ریال مەدرید یەك لەو دوو یاریزانە دەبێت كە سیلڤیۆ بیرلسكۆنی خاوەنی میلان حەز بە هێنانیان دەكات بۆ یانەكە كاتێك خۆی دەگەڕێتەوە بۆ وەرگرتنەوەی پۆستی سەرۆكی یانەكە و ئەو یاریزانەی تریش كە بیرلسكۆنی بیری لێدەكاتەوە، كارلۆس تێڤێزی هێرشبەری ئەرجنتینی دەبێت كە لەگەڵ یانەی مانچستەر ستیدا كێشەی زۆرە.
سەرچاوە رۆژنامەوانییەكانی ئیتاڵیا ئاشكرایان كردووە بیرلسكۆنی بە نیازە لە ئاهەنگێكی خێرخوازیدا كە لە رۆژی 14ی ئەم مانگە ئەنجام دەدرێ، گەڕانەوەی خۆی بۆ سەرۆكایەتی یانەكە ئاشكرا بكات دوای ئەوەی دەستی لە سەرۆكایەتی حكوومەتی ئیتاڵی كێشایەوە.
كاكا لە هاوینی 2009 دوای 6 ساڵی پڕ سەركەوتن یانەی میلانی جێهێشت.