یەكێتیی تۆپی پێی ئیسپانیا ئاشكرای كرد لێكۆڵینەوە لە وەرگرتنی كارتی زەرد لەلایەن هەردوو یاریزان چابی ئەلۆنسۆی ناوەڕاستی ریال مەدرید و جیرارد پیكێی بەرگریكەری بەرشەلۆنە دەكات.
یەكێتییەكە ئاشكرای كردووە ئەو دوو یاریزانە بۆ ئامادەبوون لە یاری كلاسیكۆی نێوان هەردوو یانە لە 10ی ئەم مانگە، بە ئەنقەست ناوبژیوانی یارییەكانی ریال مەدرید-ئەتلەتیكۆ مەدرید و بەرشەلۆنە- رایۆ ڤالیكانۆ ناچار كردووە كارتی زەردیان بداتێ تا دەستەبەری یاریكردن لە كلاسیكۆ بكەن.
بەپێی یاسای یەكێتیی تۆپی پێی ئیسپانیا هەر یاریزانێك 5 كارتی زەرد بە دوای یەكدا وەربگرێت، یاری شەشەم رادەگیرێت تا لە كارتە زەردەكات پاك ببێتەوە و ئەو دوو یاریزانە ئەو یاسایەیان بۆ مسۆگەركردنی یاریكردن لە كلاسیكۆ بەكارهێنا.
یەكێتیی تۆپی پێی ئیسپانیا گوتی بەپێی یاسا نوێیەكانی یەكێتییەكە هەر یاریزانێك بە ئەنقەست خۆی تووشی كارتی زەرد بكات لە بری یارییەكە دوو یاری رادەگیرێت و بە بڕی 6 هەزار یۆرۆ سزا دەدرێت، ئەگەر بسەلمێ ئەو دوو یاریزانە بە ئەنقەست كارتیان وەرگرتووە لە كلاسیكۆدا یاری ناكەن.