هەڵمەتی یاریزانان و راهێنەرانی یانەی بەرشەلۆنە بۆ دروستكردنی فشاری دەروونیی لەسەر یاریزانانی ریال مەدرید و بەرزكردنەوەی ورەی خۆیان دوای ژمارەیەك ئەنجامی خراپی یانەكە بەردەوامە و دوای گواردیۆلا و ڤیا و پیكێ و ڤاڵدێز، ئەمجارەیان دانی ئەلڤێشی بەرازیلی دووپاتی كردەوە بەرشەلۆنە لە كلاسیكۆدا لە ریال مەدرید دەباتەوە.
ئەلڤێش لە هەڵمەتی رۆژنامەكانی ئیسپانیادا لە دژی جیرارد پیكێی بەرگریكەری یانەكە بەهۆی وەرگرتنی پێنجەم كارتی زەردەوە لە یاری بەرشەلۆنە و رایۆ ڤالیكانۆ، دووپاتی كردەوە كە یاریزانانی بەرشەلۆنە بایەخ بەوە نادەن كە لە دەرەوە دەگوترێ و گوتی ئەوەی رۆژنامەكان دروستی دەكەن هەمووی بۆ فشار دروستكردنە لەسەر بەرشەلۆنە، بەڵام دڵنیابن ئەوە كار لە ئێمە ناكات و بە بردنەوەی كلاسیكۆ وەڵامی هەمووان دەدەینەوە.
ئەلڤێش گوتی لە رایۆ ڤالیكانۆمان بردەوە كە یانەیەكە خاوەنی كەسایەتی خۆیەتی، ئەمە سەرەتای گەڕانەوەی ئێمەیە و دوای ئەوە لە لیڤانتی دەبەینەوە و بێگومان لە كلاسیكۆدا بەسەر ریال مەدریدا سەردەكەوین و جیاوازیی خاڵەكانمان لەگەڵ ریال بەم نزیكانە نامێنێت.