رۆژنامەی سپۆرتی نزیك لە یانەی بەرشەلۆنەی ئیسپانی راپۆرتێكی بڵاوكردەوە كە دواكەوتنی بەرشەلۆنە لە ریال مەدرید بە جیاوازیی 6 خاڵ، كۆتایی وەرزی ئەمساڵ نییە و یانەی بەرشەلۆنە توانای گۆڕینی دۆخەكەی هەیە.
سپۆرت گوتی بەرشەلۆنە لە ساڵی 1991-1992 بە جیاوازیی 8 خاڵ لە پشت ریال مەدریدەوە بوو، بەڵام یانەكە بێ ئومێد نەبوو لە گەڕانەوە بۆ پێشەنگی خولەكە كە ئەوكات یانەكە یۆهان كرۆیڤ سەرپەرشتی دەكرد و توانی نازناوی خولەكە بباتەوە.
وەك رۆژنامەكە دەڵێ ئەو ساڵە نازناوی لالیگا لە دوا یاریدا یەكلادەبووەوە كە هەردوو یانە پێش ئەو یارییە لە خاڵدا یەكسان بووبوونەوە و لە دوا یاری خولەكەدا یانەی ریال مەدرید بەرامبەر تینێرفی یاری دەكرد و بەرشەلۆنەش رووبەڕووی بلباو دەبووەوە.
سپۆرت روونی دەكاتەوە كە یانەی بەرشەلۆنە لە یارییەكەی خۆیدا 2-0 سەركەوتنی بەدەست هێنا، بەڵام ئەوەی چاوەڕێ نەدەكرا ئەوەبوو كە یانەی ریال مەدرید 2-3 بە یانەی تێنرێفی دۆڕا و بەوەش نازناوی خولەكە بووە مافی بەرشەلۆنە.
رۆژنامەكە دەڵێ یاریزانەكانی بەرشەلۆنە دەتوانن هەمان سیناریۆ دووبارە بكەنەوە.