مارك هامسیكی كاپتنی یانەی ناپۆلی ئیتاڵی گوتی تیپەكەمان توانای بردنەوە لە یانەی یۆڤنتۆسی هەیە لە كاتی یاریكردنی نێوانیان سێشەمەی داهاتوو لە گەڕی 11ی خولی ئیتاڵی.
یاریزانە سلۆڤاكییەكە گوتی لە یۆڤنتۆس دەبەینەوە، ئەمساڵ وا راهاتووین ئەنجامی گەورە لەگەڵ گەورەكاندا بەدەست بێنین.
هەروەها گوتی پێویستە هەڵكشانی یۆڤنتۆس رابگرین و هەوڵ بدەین نەهێڵین ئەو یانەیە لەوە زیاتر پێشڕەوی بەرەو لوتكەی خولی ئیتاڵی بكات.
ئێستا یۆڤنتۆس بە 25 خاڵ پێشەنگی خولی ئیتاڵی گرتووە و یارییەكی دواخراویشی هەیە.
لەبارەی نوێكردنەوەی گرێبەستەكەیەوە لەگەڵ ناپۆلی، هامسیك گوتی هەموو شتێك بە باشی دەڕوات.
لە بەرامبەردا و هەر لەبارەی یاری نێوان ئەو دوو یانەیەوە سیمۆنی پیپێی یاریزانی یۆڤنتۆس گوتی ئێمە ئێستا لە لوتكەداین و بێگومان رێگا نادەین وا بەئاسانی ناپۆلی زنجیرەی سەركەوتنە بەردەوامەكانمان بپچڕێنێت.
لە وەرزی ئەمساڵدا ناپۆلی چەند سەركەوتنێكی گەورەی بەسەر یانەكانی میلان و ئینتەر میلان و مانچستەر ستیدا بەدەست هێناوە.