دوای كۆبوونەوەی نێوان ریكاردۆ تیكشێرای سەرۆكی یەكێتیی تۆپی پێی بەرازیل و رۆناڵدۆی دیاردەی بەرازیلی، هەردوو لا رێكەوتن لەسەر ئەوەی رۆناڵدۆ پۆستی سەرۆكی لیژنەی ناوخۆیی رێكخەری مۆندیالی 2014ی بەرازیل بگرێتە ئەستۆ.
رۆژنامەی گلۆبۆی بەرازیلی گوتی رۆناڵدۆی ئەفسانە وەرگرتنی بەرپرسیاریەتییەكەی قبووڵ كردووە كە سەرپەرشتی لیژنەیەكی 3 كەسی دەكات بۆ رێكخستن و بەڕێوەبردنی مۆندیالەكە كە بڕیارە هاوینی 2014 لە بەرازیل بێتە ئەنجامدان.
ئەو لیژنەیە پێشتر لەلایەن تێكسیرا خۆیەوە بەڕێوە دەبرا، بەڵام یەكێتیی تۆپی پێی نێودەوڵەتی رەخنەی زۆری لە ئامادەكارییەكانی بەرازیل بۆ مۆندیالی 2014 گرت بەهۆی دواكەوتنی بەشێك لە كارەكانی نۆژەنكردنەوەی یاریگاكانەوە.
سەرچاوە رۆژنامەوانییەكان گوتیان رەخنەكانی فیفا لە بەرازیل تۆڵەی پلاتەری سەرۆكی ئەو یەكێتییەیە لە تیكسێرا كە لە هەڵبژاردنەكانی سەرۆكایەتی فیفادا پشتگیری لە محەمەد بن هەمان كردبوو بۆ وەرگرتنی ئەو پۆستە.