روونی: تەنیا لە پشتگری راست دەترسم
روونی هێرشبەری یانەی مانچستەر یونایتدی ئینگلیزی گوتی دڵخۆشم بە شوێنی ئیستای یاریكردنم كە هێڵی ناوەڕاستە و دان بەوەدا دەنێم توانای یاریكردنم لە هەموو شوێنێكی ناو یاریگادا هەیە تەنیا پشتگری راست نەبێت.
روونی لە چاوپێكەوتنی رۆژنامەی میرۆری بەریتانیدا گوتی گرنگ نییە بەلامەوە لە كوێ یاری دەكەم، ئەوەی بەلامەوە گرنگە و دڵخۆشم دەكات ئەوەیە لە نێو یاریگادا بم جا شوێنی یاریكردنم هەر جێگایەك بێت.
ئەو یاریزانە زیاتر گوتی لەوانەیە تەنیا شوێنی یاریكردنی پشتگری راست بۆ من كێشە بێت و نەتوانم یاری لێ بكەم، دەنا یاریكردن لە ناوەڕاستی یاریگا شوێنێكی زۆر گونجاوە بۆ من و دەتوانم ئاستی بەرزی تێدا پێشان بدەم.
روونی لە چەند یاری رابردووی مانچستەر یونایتددا لە ناوەڕاستی یاریگا یاری دەكات و رۆژنامەكانی ئینگلتەرا دەڵێن ئەمە لەبەرئەوەیە كە ئەو یانەیە كێشەی لە یاریزانی پلەی مەیكەردا هەیە كە لە دوای وازهێنانی سكۆڵزەوە هیچ یاریزانێكی نییە ئەو شوێنە پڕ بكاتەوە.
