ئەندرێ ڤیلاش بواشی راهێنەری یانەی چێڵسی ئینگلیزی بە دووری زانی رۆمان ئەبرامۆڤیجی خاوەنی یانەكە بیر لە دەركردنی بكاتەوە بەهۆی ئەنجامە خراپەكانی یانەكەوە.
ڤیلاش كە دوێنێ یارییەكی تری لە خولی ئینگلیزیدا بەرامبەر یانەی لیڤەرپوول 2-1 دۆڕاند و ئەمە چوارەم دۆڕانی ئەو یانەیەیە لە دوای 12 هەفتەی خولی ئینگلیزی.
ئەو راهێنەرە پورتوگالییە گوتی تیپەكەمان لە قۆناخی گواستنەوەدا نییە و دەبێ بیر لە چاكردنی ئاست و ئەنجامەكانی تیپەكە بكەینەوە و ئێستا من كار بۆ ئەوە دەكەم.
هەروەها گوتی ئەبرامۆڤیج 13 ملیۆن پاوەندی دا بۆ ئەوەی گرێبەستی من لەگەڵ پۆرتۆ هەڵبوەشێنێتەوە، باوەڕناكەم ئەوەندەی تر پارە بدات كاتێك بیەوێ من لە پۆستەكەم دووربخاتەوە و جارێكی تر پارەی هەڵوەشاندنەوەی گرێبەستەكەم بدات.
بواش هەروەها دڵنیایی خۆی لەوە پێشاندا كە ئەمساڵ چێڵسی توانای بردنەوەی نازناوەكانی هەیە و گوتی هێشتا زووە بۆ ئەوەی بڕیار بدەین لەوەی ئەمساڵ هیچمان پێ ناكرێت و ناتوانین نازناوەكان ببەینەوە.