سیسك فابریگاسی یاریزانی یانەی بەرشەلۆنە هۆشداری لە هێزی یانەی ریال مەدرید لە وەرزی ئەمساڵدا دا و گوتی ئەو تیپە بە هێزەوە ركابەریی لەسەر وەرگرتنەوەی نازناوی خولی ئیسپانی دەكات و خاڵی زیاتر لە دەست نادات.
فابریگاس لە لێدوانی بۆ رۆژنامەی ماركای ئیسپانی ئاستی نایابی ئەمساڵی ریال مەدریدی پەسن كرد و گوتی ئەو تیپە توانای ئەوەی هەیە دوای 3 ساڵ جارێكی تر نازناوی خولی ئیسپانی بۆ خۆی بباتەوە.
لەبارەی گەڕانەوەیەوە بۆ بەرشەلۆنە لە سەرەتای وەرزی ئەمساڵدا، سیسك رەزامەندی تەواوی خۆی لە ئاستی خۆی دەربڕی و گوتی ئێستا یەك لە خۆشترین كاتەكانی ژیانم بەسەر دەبەم.
ئەو یاریزانە كە هاوینی 2010 لەگەڵ هەڵبژاردەی ئیسپانیادا نازناوی مۆندیالی بەدەست هێنا، پەسنی چاڤی هێرناندێزی یاریزانی یانەكەی كرد و گوتی لەوەتەی هاتوومەتە بەرشەلۆنە چاڤی هاوكارییەكی زۆرم دەكات و هەردەم سوود لە ئاست و لێهاتوویی ئەو وەردەگرم بۆ یاریكردن لە ناوەڕاستی بەرشەلۆنە.