زینەدین زێدانی ئەفسانەی فەرەنسی بە باشترین یاریزانی 20 ساڵی رابردووی خولی یانە پاڵەوانەكانی ئەوروپا دەست نیشانكرا.
زیزۆ كە پێشتر ئەستێرەی ریال مەدریدی ئیسپانی بوو، بە دەنگدان بۆ هەڵبژاردنی باشترین یاریزانی 20 ساڵی رابردووی پاڵەوانیەتییە ئەوروپییەكە دیاری كرا كە رۆژنامەنووسان و یاریزانان و خەڵكانی ئاسایی دەنگیان تێدا دا.
زێدانی سەرتۆپی لیستی باشترین یاریزانی گرت و دوای ئەو میسی یاریزانی بەرشەلۆنە هات و دوای ئەوانیش پاولۆ ماڵدینی كاپتنی پێشووی یانەی میلان.
هەڵبژاردنی زیزۆ بەهۆی ئەو گۆڵە ئەفسانەییەوە بوو كە وەرزی 2001-2002 لە یاری كۆتایی خولی یانە پاڵەوانەكان لە یانەی بایەر لیڤەركوزنی ئەڵمانی كرد و بەهۆیەوە یانەكە نازناوی خولەكەی بەدەست هێنا.
گۆڵەكە جیا لەوەی نموونەییە لەبەرئەوەی زێدان لە ناوچەی سزای بایەر لیڤەركوزندا تەماشای ئاسمان دەكات بۆ ئەوەی ئەو تۆپەی بگاتێ كە رۆبەرتۆ كارلۆسی بەرازیلی ناردوویەتی و كاتێك تۆپەكە دەگاتە زیزۆ ئەو بە قاچی چەپی و بە لێدانێكی ئاسمانیی و خێرا ئاراستەی گۆڵی یانەی بەرامبەری دەكات و ئەنجامی یارییەكە دەبێتە 2-1 و ریال مەدرید نازناوەكە بەدەست دێنێت.